اسلام آباد(ويب ڊيسڪ) خيبر پختونخوا ۾ پاڪ فوج طرفان ٻن الڳ الڳ انٽيليجنس بنياد تي ڪيل ڪارروائين دوران ڀارتي حمايتي تنظيم فتنہ الخوارج سان لاڳاپيل 9 خوارج مارجي ويا.
آءِ ايس پي آر موجب، ٽانڪ ضلعي ۾ 5 ڊسمبر تي خوارج جي موجودگي بابت اطلاع ملڻ بعد سيڪيورٽي فورسز ڪارروائي ڪئي، جنهن دوران ڇتي فائرنگ جي ڏي وٺ کان پوءِ 7 خوارج مارجي ويا.
ٻي ڪارروائي لڪي مروت ۾ ڪئي وئي، جتي وڌيڪ 2 خوارج سيڪيورٽي فورسز جي هٿان مارجي ويا.
مارجي ويل خوارجن وٽان هٿيار ۽ بارودي مواد به هٿ آيو، جيڪي سيڪيورٽي فورسز، قانون لاڳو ڪندڙ ادارن ۽ بيگناهه شهرين خلاف دهشتگرداڻي ڪاررواين ۾ ملوث هئا. علائقي ۾ باقي بچيل خوارج جي خاتمي لاءِ ڪليئرنس آپريشن جاري آهي.
ان دوران صدرِ آصف علي زرداري، وزيراعظم شهباز شريف ۽ وفاقي گهرو وزير محسن نقوي پاڪ فوج جي ڪامياب آپريشنن تي فورسز کي ڀيٽا پيش ڪئي.
صدر زرداري فورسز جي بروقت ۽ مؤثر ڪارروائي کي ساراهيندي چيو ته دهشتگردن جا ناپاڪ ارادا ناڪام بڻائڻ تي فورسز جو حوصلو قابلِ تعريف آهي.
وزيراعظم شهباز شريف چيو ته قوم دهشتگردي خلاف جنگ ۾ پاڪ فوج سان گڏ بيٺل آهي.
وفاقي گهرو وزير محسن نقوي به فورسز جي پيشه ورانه مهارت ۽ بهادري کي ساراهيو ۽ چيو ته خيبر پختونخوا ۾ امن جي قيام لاءِ سيڪيورٽي فورسز پرعزم آهن.
