راولپنڊي (بيورو) بلوچستان جي ضلعي شراني ۾ سيڪيورٽي فورسز پاران خفيه اطلاع تي ڪامياب انٽيليجنس بنياد تي آپريشن ڪيو ويو، جنهن دوران ڀارتي سهولت يافته دهشتگرد گروپ “فتنه الخوارج” سان لاڳاپيل 7 دهشتگرد مارجي ويا.
آءِ ايس پي آر موجب آپريشن دوران دهشتگردن جي ٺڪاڻن تان وڏي مقدار ۾ هٿيار، بارودي مواد ۽ ڌماڪيدار سامان هٿ ڪيو ويو. پاڪ فوج جو چوڻ آهي ته ملڪ مان دهشتگردي جي لعنت کي مڪمل طور ختم ڪرڻ لاءِ سيڪيورٽي فورسز پرعزم آهن ۽ اهڙيون ڪارروايون جاري رهنديون.
وزيراعظم شهباز شريف آپريشن تي سيڪيورٽي فورسز کي خراج تحسين پيش ڪندي سندن پيشورانه صلاحيتن جي واکاڻ ڪئي. هن چيو ته بيگناهه شهرين جي جان ۽ مال کي نقصان پهچائيندڙ دهشتگردن کي شڪست ڏني وئي، حڪومت ۽ ادارا دهشتگردي جي خاتمي لاءِ هر ممڪن قدم کڻڻ لاءِ پرعزم آهن.
وزيراعظم وڌيڪ چيو ته پاڪستان جي سلامتي کي نقصان پهچائڻ جا خواب ڏسندڙ ڪڏهن به ڪامياب نه ٿيندا، دهشتگردي جي بلا کي جڙ کان اکوڙيو ويندو.
وفاقي گهرو وزير محسن نقوي به آپريشن تي سيڪيورٽي فورسز جي بهادري ۽ صلاحيتن جي ساراهه ڪئي. هن چيو ته بروقت ڪارروائي سان دهشتگردن جا مذموم ارادا ناڪام بڻايا ويا، 7 دهشتگردن کي ماريندڙ جوانن کي سلام پيش ڪريان ٿو.
محسن نقوي چيو ته بلوچستان ۾ امن قائم رکڻ لاءِ سيڪيورٽي فورسز جون ڪاميابيون قابل تحسين آهن، قوم دهشتگردي خلاف جنگ ۾ فورسز سان گڏ بيٺل آهي.
