اسلام آباد (ويب ڊيسڪ) پاڪ فوج جي سڪيورٽي فورسز خيبرپختونخوا جي مختلف ضلعن ۾ 13 کان 15 آڪٽوبر تائين ڪامياب آپريشنز دوران ڀارتي حمايتي فتنتھ الخوارج جي 34 دهشتگردن کي انجام تائين پهچائي ڇڏيو.
آءِ ايس پي آر پاران جاري ڪيل بيان موجب، سڪيورٽي فورسز شمالي وزيرستان، ڏکڻ وزيرستان ۽ بنون ۾ انٽيليجنس بنيادن تي آپريشنز ڪيا، جن دوران دهشتگردن جي ٺڪاڻن کي نشانو بڻايو ويو. اسپن وام ۾ شديد فائرنگ جي ڏي وٺ کانپوءِ 18 دهشتگرد مارجي ويا، جڏهن ته ڏکڻ وزيرستان ۾ 8 ۽ بنون ۾ وڌيڪ 8 دهشتگردن کي هلاڪ ڪيو ويو.
فوجي ترجمان موجب، آپريشنز دوران دهشتگردن جي ڀارتي حمايت جي تصديق پڻ سامهون آئي آهي، ۽ علائقي ۾ باقي بچيل دهشتگردن جي خاتمي لاءِ ڪليئرنس آپريشنز جاري آهن.
ان سلسلي ۾ وزيراعظم شهباز شريف سڪيورٽي فورسز جي ڪارڪردگي کي ساراهيندي چيو ته، “اسپن وام، ڏکڻ وزيرستان ۽ بنون ۾ فورسز جي پيشه ورانه مهارت سان 34 ڀارتي حمايت يافته دهشتگردن کي انجام تائين پهچايو ويو، جيڪو ملڪ جي سلامتي لاءِ اهم قدم آهي.”
وزيراعظم وڌيڪ چيو ته حڪومت دهشتگردي جي خاتمي لاءِ پرعزم آهي ۽ پاڪستاني عوام جي تحفظ لاءِ هر ممڪن قدم کنيا ويندا. ” دهشتگردي جي عفريت جي مڪمل خاتمي تائين آپريشنز جاري رهندا.”
سڪيورٽي فورسز جي هن ڪاميابي کي ملڪ جي سلامتي ۽ امن جي بحالي ڏانهن اهم اڳڀرائي قرار ڏنو پيو وڃي.
