پشاور (ويب ڊيسڪ) خيبرپختونخوا حڪومت 12 نومبر تي امن جرگو ڪوٺائڻ جو اعلان ڪندي واضح ڪيو آهي ته صوبي ۾ ڪنهن به عسڪري ڪارروائي جي اجازت نه ڏني ويندي. اسپيڪر صوبائي اسيمبلي بابر سليم سواتي، معاونِ خاص اطلاعات شفيع جان، صوبائي سيڪريٽري علي اصغر، جنرل سيڪريٽري پشاور ريجن شير علي، عرفان سليم ۽ اڳوڻو صوبائي وزير ڪامران بنگش گڏيل پريس ڪانفرنس دوران امن جرگي جي تفصيلن کان آگاهه ڪيو.
اسپيڪر بابر سليم سواتي چيو ته امن و امان تي ٻن مهينن تائين اسيمبلي ۾ بحث ٿيو، جتي سياسي قيادت جو واضح موقف سامهون آيو ته آپريشن نه ٿيڻ گهرجي. سڀني پارليامينٽرين هڪ خاص ڪميٽي تي متفق ٿيا آهن، جيڪا امن جرگي کانپوءِ ڪور ڪمانڊر سان ملاقات ڪندي.
هن ٻڌايو ته پارلياماني سيڪيورٽي ڪميٽي ٽي او آرز تيار ڪري وزيراعليٰ کي پيش ڪندي، جڏهن ته امن جرگي ۾ سڀني سياسي پارٽين جي نمائندن سان گڏ اهم سياسي شخصيتن کي به دعوت ڏني ويندي.
شفيع جان چيو ته بند ڪمرا فيصلن لاءِ نه هجڻ گهرجن، جن ماڻهن قربانيون ڏنيون آهن، انهن کي علائقائي فيصلن ۾ شامل ڪرڻ ضروري آهي. هن چيو ته امن و امان صوبي لاءِ سڀ کان وڏو چئلينج آهي، ۽ جرگي ۾ سڀني ڌرين جي راءِ شامل ڪئي ويندي.
پي ٽي آءِ جي صوبائي جنرل سيڪريٽري علي اصغر چيو ته قبائلي علائقن جي صورتحال ڪنهن کان لڪل ناهي، ۽ آپريشنز سبب ماڻهن کي بيدخلي جو سامنا آهي. امن جرگي ۾ سول سوسائٽي، وڪيل، ميڊيا ۽ سياسي مشران کي شامل ڪيو ويندو.
شير علي جو چوڻ هو ته صوبي ۾ ٿيل آپريشنز مان ڪو خاص فائدو نه ٿيو، هاڻي جيڪو به فيصلو ٿئي، اهو عوام جي حق ۾ هجڻ گهرجي. ڪامران بنگش چيو ته خيبرپختونخوا حڪومت سڀني سياسي ڌرين کي ساڻ وٺي هلڻ جو اعزاز رکي ٿي، جڏهن ته ٻين ڌرين تي فارم 47 ذريعي دٻاءُ وڌو پيو وڃي.
ذريعن موجب، امن جرگي جو مقصد ادارن ۽ عوام جي وچ ۾ فاصلا گهٽائڻ، ۽ آئين، سياست ۽ امن بابت گڏيل حڪمت عملي جوڙڻ آهي.
