اسلام آباد(ويب ڊيسڪ) وفاقي حڪومت عالمي مالياتي اداري (آءِ ايم ايف) جي هڪ ٻي اهم شرط پوري ڪري ڇڏي آهي. فيڊرل بورڊ آف ريونيو (ايف بي آر) پاران گريڊ 17 ۽ ان کان مٿي آفيسرن جي اثاثن جي ظاهر ڪرڻ بابت نوٽيفڪيشن جاري ڪيو ويو آهي.
ايف بي آر انڪم ٽيڪس آرڊيننس 2001 جي دفعه 237 جي ذيلي دفعه (1) تحت حاصل اختيار استعمال ڪندي شيئرنگ آف ڊيڪليئريشن آف ايسٽس آف سول سرونٽس رولز 2023 ۾ اهم ترميمون متعارف ڪرايون آهن.
اهي ترميمون اڳ ۾ 7 آڪٽوبر 2025 تي جاري ڪيل نوٽيفڪيشن نمبر 1912(I)/2025 تحت شايع ڪيون ويون هيون، جن کي قانوني تقاضن موجب عوامي راءِ کان پوءِ حتمي شڪل ڏني وئي آهي.
ايف بي آر جي نوٽيفڪيشن موجب نون قاعدن ۾ ڪيترين تبديليين جو اعلان ڪيو ويو آهي. سڀ کان اهم تبديلي اها آهي ته جتي به لفظ سول استعمال ٿيو آهي، اتي هاڻي پبلڪ جو لفظ شامل ڪيو ويو آهي، ۽ ذيلي شق (1) ۾ به اها تبديلي منظور ڪئي وئي آهي.
رول 2 ۾ هڪ نئين شق (ii-a) شامل ڪئي وئي آهي، جنهن مطابق پبلڪ سرونٽ سان مراد وفاقي يا صوبائي حڪومتن، خودمختيار ادارن، سرڪاري ڪارپوريشنز يا حڪومت جي ملڪيت وارن ڪمپنين جا اهي آفيسر هوندا جن جو پيسڪل 17 يا ان کان مٿي هجي. ان تعريف ۾ اهي ملازم به شامل ڪيا ويا آهن جيڪي سول سرونٽس ايڪٽ 1973 تحت اچن ٿا.
ان شق ۾ اهي فرد شامل نه هوندا جن کي قومي احتساب آرڊيننس 1999 جي دفعه 5 جي ڪلاز (n) جي ذيلي شق (iv) تحت استثنا حاصل آهي.
ايف بي آر موجب انهن ترميمن جو مقصد قاعدن کي وڌيڪ جامع ۽ هم آهنگ بڻائڻ آهي، جيئن سرڪاري ۽ نيم سرڪاري آفيسرن جي اثاثن بابت معلومات جي ڏي وٺ جو نظام وڌيڪ واضح، مؤثر ۽ شفاف ٿي سگهي.
