اسلام آباد: وفاقي حڪومت عالمي مالياتي اداري (آءِ ايم ايف) سان ٽيڪس هدف ۾ 150 ارب رپين جي گهٽتائي تي اتفاق ڪري ورتو آهي. ذريعن موجب، نئون ٽيڪس هدف 14,131 ارب رپين مان گهٽائي 13,981 ارب رپيا مقرر ڪيو ويو آهي، جڏهن ته ملڪ ۾ آيل تباهه ڪندڙ ٻوڏ جي تصديق ٿيل نقصانن جي رپورٽ جي بنياد تي وڌيڪ ڪمي جو امڪان پڻ موجود آهي.
نئين مالي سال لاءِ جي ڊي پي واڌ جي شرح 3.5 سيڪڙو ۽ ٽيڪس ٽو جي ڊي پي شرح 11 سيڪڙو مقرر ڪئي وئي آهي، پر خدشو ظاهر ڪيو ويو آهي ته جي ڊي پي 1 لک 29 هزار ارب رپين جي هدف تائين نه پهچي سگهندي.
آءِ ايم ايف سان نئين ايم اي ايف پي ڊرافٽ تي ميڪرو اڪنامڪ فريم ۾ تبديلي تي به اتفاق ڪيو ويو آهي، جنهن تحت 1.2 ارب ڊالر جي قسط لاءِ نئين ڪنٽري رپورٽ ۾ سڀ بينچ مارڪ شامل ڪيا ويندا.
ياد رهي ته ڪجهه ڏينهن اڳ آءِ ايم ايف پاڪستان ۾ شديد ٻوڏ جي تباهه ڪارين سبب معاشي توازن بگڙڻ جو خدشو ظاهر ڪيو هو. مڊل ايسٽ اينڊ سينٽرل ايشيا جي ريجنل اڪنامڪ آئوٽ لُڪ رپورٽ ۾ آءِ ايم ايف خبردار ڪيو هو ته ٻوڏ سبب معاشي واڌ، مهانگائي ۽ ڪرنٽ اڪائونٽ جو توازن متاثر ٿي سگهي ٿو.
رپورٽ موجب، رواں سال معاشي واڌ جي شرح 4.2 سيڪڙو جي هدف جي مقابلي ۾ 3.6 سيڪڙو رهڻ جو امڪان آهي، جڏهن ته مهانگائي ۾ ٻيهر واڌ جو خدشو پڻ موجود آهي.
