اسلام آباد (نمائندو خصوصي) عالمي مالياتي اداري (آءِ ايم ايف) پاڪستان جي موجوده مالي سال جي پهرين ٽه ماهي دوران لڳ ڀڳ 194 ارب رپين جي آمدني جي کوٽ کي معيشيت لاءِ خطرناڪ قرار ڏيندي، ان کي پورو ڪرڻ لاءِ اضافي ٽيڪس لڳائڻ جي تجويز پيش ڪئي آهي.
پاڪستان ۽ آءِ ايم ايف جي وچ ۾ جاري ٻئي اقتصادي جائزي جي پاليسي سطح تي ڳالهين جو مرحلو آخري مرحلي ۾ داخل ٿي ويو آهي، جتي ٻنهي ڌرين وچ ۾ “ميمورنڊم آف ايڪنامڪ اينڊ فنانشل پاليسيز” جي مسودي تي مشاورت جاري آهي.
ذريعن موجب، وفاقي سيڪريٽري خزانه جي سربراهيءَ ۾ معاشي ٽيم آءِ ايم ايف مشن سان ملاقات ڪئي، جڏهن ته وفاقي وزير خزانه محمد اورنگزيب جي به مشن سان ملاقات متوقع آهي. ڳالهين دوران ٽيڪس هدفن، ٽيڪس نيٽ وڌائڻ ۽ آمدني جي کوٽ کي پورو ڪرڻ لاءِ مختلف تجويزن تي غور ڪيو ويو.
آءِ ايم ايف پاران تجويز ڏني وئي ته ڪجهه شعبن تي نوان ٽيڪس لاڳو ڪيا وڃن، جڏهن ته ڪجهه شعبن تي اڳ ئي لاڳو رعايتي ٽيڪس جي شرح ختم ڪري معياري شرح لاڳو ڪئي وڃي. ان سلسلي ۾ ايف بي آر جي ميمبر ڪسٽمز پاليسي سميت ٻين اختيارين به ڳالهين ۾ حصو ورتو.
حڪومتي ٽيم جو چوڻ آهي ته ٽيڪس تنازعات ۾ ڦاٿل اربين رپين جي واجبات جي وصولي آمدني جي کوٽ کي گهٽ ڪرڻ ۾ مددگار ثابت ٿيندي، جڏهن ته انتظامي ۽ انفورسمنٽ قدمن ذريعي به اضافي آمدني حاصل ڪئي ويندي.
ان سان گڏ، شوگر سيڪٽر جي ڊي ريگوليشن، آٽو پاليسي ۽ ٽيرف سڌارن تي به تفصيلي بريفنگ ڏني وئي. شوگر سيڪٽر جي آزاديءَ جو مقصد چيني جي صنعت تي حڪومت جو ڪنٽرول گهٽائڻ آهي ته جيئن مارڪيٽ پاڻ قيمتن ۽ پيداوار جو تعين ڪري. آٽو پاليسي تحت گاڏين جي پيداوار، قيمتن ۽ ٽيرف جو تعين ڪيو ويندو.
وفاقي حڪومت صوبائي حڪومتن تي زور ڏنو آهي ته هو آءِ ايم ايف سان لاڳاپيل التوا هيٺ معاملن کي جلد حل ڪن ته جيئن 7 ارب ڊالر جي توسيعي مالي معاهدي (اي ايف ايف) جي ٻئي جائزي تي ڳالهين کي هفتي جي آخر تائين ڪاميابي سان مڪمل ڪري سگهجي.
وزيراعظم آفيس پاران صوبائي دارالحڪومتن ۾ مقرر وفاقي آفيسرن سان رابطو ڪري هدايتون ڏنيون ويون آهن ته هو التوا هيٺ معاملن ۽ ايندڙ هدفن تي پيش رفت کي آءِ ايم ايف سان ڪيل واعدن مطابق هم آهنگ ڪن. اهي هدايتون صرف اي ايف ايف لاءِ نه، پر 1.4 ارب ڊالر جي موسمياتي لچڪ ۽ پائيداري فنڊ (ريزيليئنس اينڊ سسٽين ايبلٽي فئسيلٽي) لاءِ به ڏنيون ويون آهن.
صوبائي چيف سيڪريٽريز ۽ فنانس سيڪريٽريز کي 24 ڪلاڪن اندر پيش رفت جي تازي رپورٽ جمع ڪرائڻ جي هدايت ڪئي وئي آهي، ۽ ڪنهن به هدف جي پوري نه ٿيڻ يا دير جي واضح سببن جي وضاحت طلب ڪئي وئي آهي.
آءِ ايم ايف خبردار ڪيو آهي ته علائقائي ڇڪتاڻ ۾ ممڪن واڌ معيشيت لاءِ خطرناڪ ٿي سگهي ٿي، جنهن سبب معاشي واڌ جي رفتار سست ٿي سگهي ٿي. عالمي سطح تي غير يقيني صورتحال برقرار آهي، جيڪا پرڏيهي سيڙپڪارن جي اعتماد کي متاثر ڪري سگهي ٿي، جڏهن ته ڇڪتاڻ وڌڻ سان اجناس جي قيمتن ۾ واڌ جو امڪان پڻ ظاهر ڪيو ويو آهي.
