نيويارڪ(ويب ڊيسڪ) گڏيل قومن جي سلامتي ڪائونسل جي هڪ تازي رپورٽ طالبان جي ان دعويٰ کي غلط قرار ڏنو آهي، جنهن ۾ چيو ويو هو ته افغان سرزمين ڪنهن به دهشتگردي لاءِ استعمال نٿي ٿئي. رپورٽ موجب طالبان جو موقف اعتبار جوڳو ناهي ۽ خطي جا پاڙيسري ملڪ تيزي سان افغانستان کي علائقائي عدم استحڪام جو ذريعو سمجهڻ لڳا آهن۔
گڏيل قومن جي تجزياتي معاونت ۽ پابندي نگراني ٽيم جي 16هين رپورٽ ۾ چيو ويو آهي ته طالبان لاڳيتو انڪار ڪندا رهيا ته افغانستان ۾ ڪنهن دهشتگرد گروهه جي موجودگي آهي يا اتي کان سرحد پار حملن جي منصوبابندي ٿئي ٿي، پر رپورٽ مطابق حقيقت ان جي ابتڙ آهي۔
رپورٽ ۾ واضح ڪيو ويو آهي ته داعش خراسان، تحريڪ طالبان پاڪستان (ٽي ٽي پي)، القاعده، ترڪستان اسلامڪ پارٽي ۽ ٻيا ڪيترائي ويڙهاڪ گروهه افغانستان ۾ سرگرم آهن، ۽ انهن مان ڪجهه گروهن افغان سرزمين کي ٻاهرين ملڪن تي حملن جي منصوبابندي لاءِ استعمال ڪيو آهي۔
گڏيل قومن موجب القاعده جا طالبان سان قريبي لاڳاپا برقرار آهن ۽ تنظيم جا ڪارڪن ڪيترن افغان صوبن ۾ موجود آهن، جتي کين تربيت ۽ ٻيهر منظم ٿيڻ جا موقعا ملي رهيا آهن۔ رپورٽ ۾ وڌيڪ چيو ويو آهي ته داعش خراسان طالبان جو وڏو مخالف گروهه آهي، ۽ طالبان جي ڪارروائين باوجود گروهه جا حمله جاري آهن، جيڪي خطي جي سلامتي لاءِ سنجيده خطرو بڻيل آهن۔
