اسلام آباد (بيورو) پرڏيهي ترجمان اعلان ڪيو آهي ته پاڪستان ۽ افغان طالبان جي وچ ۾ اهم ڳالهيون سڀاڻي ٿينديون، جن ۾ افغانستان مان ٿيندڙ دهشتگردي جي معاملن تي ڳالهيون ٿينديون.
هفتيوار بريفنگ دوران پرڏيهي کاتي جي ترجمان طاهر اندرابي چيو ته پاڪستان افغان طالبان تي زور ڏئي ٿو ته هو پاڪستان جي خدشن جو ازالو ڪن ۽ عالمي برادري سان ڪيل واعدن تي عملدرآمد ڪن.
هن ٻڌايو ته ڳالهين جي ميزباني ترڪيه ڪري رهيو آهي، جڏهن ته پاڪستان دوحه ڳالهين جي فريم ورڪ تحت افغانستان جي صورتحال تي نظر رکي آهي. ترجمان جو چوڻ هو ته افغانستان کي دوحه معاهدي تحت ڪيل واعدن تي عمل ڪرڻ گهرجي.
طاهر اندرابي واضح ڪيو ته پاڪستان اسرائيل جي اولهه ڪناري جي حصن کي ضم ڪرڻ جي ڪوششن جي سخت مذمت ڪري ٿو ۽ فلسطين جي ڪاز لاءِ پنهنجي مڪمل حمايت ڪري ٿو.
ترجمان ٻڌايو ته عالمي عدالت انصاف اسرائيل خلاف مشاورتي راءِ ڏني آهي، جنهن تحت اسرائيل کي امدادي سرگرمين ۾ رڪاوٽ نه وجهڻ جو پابند ڪيو ويو آهي. جنوري 2024 کان وٺي هي اسرائيل خلاف عالمي عدالت جو چوٿون فيصلو آهي.
هن وڌيڪ چيو ته او آءِ سي ۽ ڪيترن ئي اسلامي ملڪن عالمي عدالت جي فيصلي جي روشني ۾ گڏيل اعلاميو جاري ڪيو، جنهن ۾ مقبوضه فلسطين جي حصن کي ضم ڪرڻ بابت نون غير قانوني اسرائيلي قانونن جي سخت مذمت ڪئي وئي.
ترجمان آگاهي ڏني ته پولينڊ جو پرڏيهي وزير ٻن ڏينهن جي دوري تي پاڪستان آيو، جتي ٻنهي ملڪن وچ ۾ ٻه طرفي لاڳاپن ۽ مختلف شعبن ۾ تعاون وڌائڻ تي اتفاق ڪيو ويو، جڏهن ته مفاهمتي يادداشتن تي صحيحون پڻ ٿيون.
ترجمان موجب نائب وزيراعظم ۽ پرڏيهي وزير اسحاق ڊار هن هفتي دوران ٽي اهم رابطا ڪيا، جن ۾ متحده عرب امارات جي پرڏيهي وزير سان ٽيليفونڪ ڳالهه ٻولهه، جڏهن ته سعودي عرب ۽ مراڪش جي پرڏيهي وزيرن سان پڻ رابطا ٿيا.
ترجمان آخر ۾ واضح ڪيو ته پاڪستان دهشتگردي خلاف مضبوط ۽ قابل تصديق نظام جي قيام جي حمايت ڪري ٿو.
