ڪاراڪاس(ويب ڊيسڪ) آمريڪي صدر ڊونلڊ ٽرمپ وينزويلا تي هوائي حملن جي تصديق ڪندي چيو آهي ته ملڪ جي قيادت خلاف آپريشن ڪيو ويو آهي. ٽرمپ سوشل ميڊيا پليٽ فارم “ٽرٿ” تي بيان جاري ڪندي ٻڌايو ته آپريشن دوران وينزويلا جي صدر نيڪولس مادورو ۽ سندس زال کي گرفتار ڪري ملڪ کان ٻاهر منتقل ڪيو ويو آهي.
صدر ٽرمپ جو چوڻ هو ته هي آپريشن قانون لاڳو ڪندڙ ادارن سان گڏجي ڪيو ويو آهي، جڏهن ته وڌيڪ تفصيل هو اڄ رات پريس ڪانفرنس ۾ ڏيندو.
ٻئي طرف وينزويلا جي گاديءَ واري شهر ڪاراڪاس ۾ هوائي حملا ۽ ڌماڪن کان پوءِ صورتحال انتهائي ڳنڀير ٿي وئي آهي. شهرين موجب گهٽ ۾ گهٽ ست زور دار ڌماڪا ٻڌا ويا ۽ آمريڪي فوجي هيليڪاپٽر سي ايڇ 47 چينوڪ کي هيٺانهين ۾ اُڏام ڪندي ڏٺو ويو. ڪيترن ئي علائقن ۾ بجلي غائب ٿي وئي ۽ آسمان ۾ ڳاڙهو ڌوئوُ اُٿندي ڏٺو ويو.
ميڊيا رپورٽن مطابق آمريڪي حملي ۾ وينزوالا جي وزير دفاع ولاديمير پيڊرينو لوپيز جي گهر کي نشانو بڻايو ويو، جنهن کان پوءِ وزير دفاع سان رابطو ممڪن نه رهيو آهي.
هن صورتحال ۾ صدر مادورو کي محفوظ مقام تي منتقل ڪيو ويو آهي، جڏهن ته صدارتي محل جي چوڌاري بڪتربند گاڏيون گشت ڪري رهيون آهن. مادورو جو چوڻ آهي ته آمريڪا وينزويلا جي تيل ۽ معدنيات تي قبضو ڪرڻ چاهي ٿو، پر هو ڪامياب نه ٿيندو.
