اسلام آباد(ويب ڊيسڪ) پاڪستان جي دفتر خارجہ جي ترجمان طاهر حسين اندرابي ڀارتي پرڏيهي وزير پاران پاڪستان بابت ڏنل بيانن تي سخت ردعمل ظاهر ڪندي چيو آهي ته پاڪستان انهن غير ذميوارڻن الزامن کي مڪمل طور تي رد ڪري ٿو.
ترجمان جو چوڻ هو ته ڀارت هڪ ڀيرو ٻيهر خطي ۾ عدم استحڪام ۽ دهشتگردي جي هٿي ڏيڻ ۾ پنهنجي ڏکوئيندڙ ڪردار تان ڌيان هٽائڻ جي ڪوشش ڪري رهيو آهي. هن چيو ته پاڪستان ۾ دهشتگرد سرگرمين جي ڀارتي پٺڀرائي بابت دستاويزي ثبوت موجود آهن.
هن وڌيڪ چيو ته ڪلبھوشن ياديـو جو معاملو پاڪستان خلاف منظم، رياستي سرپرستي ۾ ٿيندڙ دهشتگردي جي هڪ واضح مثال آهي. ان کان سواءِ ماوراءِ سرحد قتل، پراڪسي عنصر ذريعي تخريبي ڪارروايون ۽ دهشتگرد نيٽ ورڪن کي خفيه سهڪار ڏيڻ جا بار بار واقعا انتهائي ڳڻتي جوڳا آهن.
ترجمان جو چوڻ هو ته ڀارت جو هي رويو هندوتوا جي انتهاپسند سوچ ۽ ان جي پرتشدد حامين جي نظريي سان هڪجهڙائي رکي ٿو. هن وڌيڪ چيو ته ڀارت بدستور جمـو ۽ ڪشمير تي غير قانوني ۽ پرتشدد فوجي قبضو برقرار رکيو آهي، جڏهن ته پاڪستان ڪشميري عوام جي جائز جدوجهد ۾ اقوام متحده جي سلامتي ڪائونسل جي قراردادن مطابق حقِ خوداراديت لاءِ سياسي، اخلاقي ۽ سفارتي سهڪار جاري رکندو.
ترجمان وڌيڪ چيو ته سندھ طاس معاهدو هڪ بين الاقوامي معاهدو آهي جيڪو نيڪ نيت ۽ قربانين سان طئي ٿيو. ڀارت طرفان ان معاهدي جي ڪنهن به يڪطرفي خلاف ورزي سان علائقائي استحڪام کي نقصان پهچندو ۽ بين الاقوامي قانوني ذميوارين جي احترام بابت ڀارت جي دعوائن تي سوال اُٿبا.
هن زور ڏنو ته پاڪستان معاهدي تحت پنهنجن جائز حقن جي تحفظ لاءِ سڀ ضروري قدم کڻندو.
