لنڊن (ويب ڊيسڪ) برطانوي اخبار فنانشل ٽائمز جي سالياني جائزي ۾ انڪشاف ڪيو ويو آهي ته سال 2025 ڀارت لاءِ استحڪام ۽ ترقي بدران بحرانن، ناڪامين ۽ شديد دٻاءُ جو سال ثابت ٿيو۔
رپورٽ موجب، داخلي ۽ خارجي محاذن تي لڳاتار مشڪلاتن ڀارت کي سخت مسئلن ۾ مبتلا رکيو۔ پاڪ-ڀارت فوجي ڇڪتاڻ، آمريڪا سان واپاري تڪرار، هڪ ڏکوئيندڙ جهاز حادثو، ڀارتي روپيي جي ڪمزوري ۽ مجموعي معاشي بيچيني 2025 دوران ڀارت جي صورتحال کي وڌيڪ پيچيده بڻايو۔
فنانشل ٽائمز لکي ٿو ته آمريڪا ۽ ڀارت جي وچ ۾ واپاري معاهدو بار بار ملتوي ٿيو، جڏهن ته آمريڪي ٽيرفز ڀارتي معيشت تي اضافي دٻاءُ وجهي ڇڏيو۔ جي ايس ٽي سڌارا محدود شعبن تائين رهڻ سبب معاشي ترقي جي رفتار متاثر ٿي، ۽ روپيو سڄي سال ڊالر جي مقابلي ۾ گهٽتائي جو شڪار رهيو۔
ماهرن جو چوڻ آهي ته پاڪ-ڀارت ڇڪتاڻ جي نتيجي ۾ ڀارت کي عسڪري برتري حاصل ڪرڻ بدران آمريڪي پاليسي ۾ تبديلي کي منهن ڏيڻُ پيو۔ آمريڪي صدر ڊونلڊ ٽرمپ طرفان جنگبندي جو ڪريڊٽ وٺڻ ۽ پاڪستاني عسڪري قيادت سان وڌندڙ لاڳاپا ڀارت جي سفارتي ناڪامي قرار ڏنا پيا وڃن۔
رپورٽ ۾ وڌيڪ چيو ويو آهي ته آمريڪا ۾ ڀارت جي معاشي ۽ سفارتي گنجائش محدود ٿي رهي آهي، جيڪا عالمي سطح تي ان جي ڪمزور پوزيشن کي ظاهر ڪري ٿي۔ روپئي جي ڪرڻ ۽ تيل جي قيمتن ۾ واڌ ڀارت لاءِ وڌيڪ معاشي مسئلا پيدا ڪري سگهي ٿي۔
فنانشل ٽائمز جي جائزي مطابق، ڀارت 2025 ۾ بحرانن کي حل ڪرڻ بدران برداشت ڪندو رهيو، جڏهن ته 2026 اندروني ڪمزورين، علائقائي ڇڪتاڻ ۽ عالمي دٻاءُ سبب ڀارت لاءِ وڏو چيلينج بڻجي رهيو آهي۔
