برسلز(ويب ڊيسڪ) امريڪي صدر ڊونلڊ ٽرمپ طرفان مسلسل ٽيرف وڌائڻ جون ڌمڪيون ۽ گرين لينڊ جي ملڪيت حاصل ڪرڻ جي ضد تي يورپي پارليمان اهم قدم کڻي ورتو آهي. عالمي خبرن موجب يورپي يونين ۽ آمريڪا جي وچ ۾ واپاري معاهدي تي ڪم کي معطل ڪرڻ جو اعلان ڪيو آهي.
پارليمان جي ڪيترن ئي ميمبرن معاهدي تي خدشا ظاهر ڪندي چيو ته هي هڪ غير متوازن معاهدو آهي، جنهن ۾ يورپي يونين جو نقصان ۽ آمريڪا جو فائدو آهي. ميمبرن موجب يورپي يونين کي درآمدي شين تي محصولات گهٽائڻا پوندا، جڏهن ته آمريڪا پنهنجي 15 سيڪڙو ٽيڪس ۾ ڪا به گهٽتائي نه ڪندو.
ان کان اڳ يورپي پارليمان جا ساڳيا ميمبر مشروط طور معاهدي کي قبول ڪرڻ لاءِ تيار هئا، جن ۾ 18 مهينن جي اختتامي مدت ۽ آمريڪي درآمدات ۾ اضافي جي جواب ۾ حفاظتي قدم شامل هئا.
تجارتي ڪميٽي جو ارادو هو ته 26 ۽ 27 جنوري تي ووٽنگ ڪئي وڃي، پر هاڻي اهو عمل ملتوي ڪيو ويو آهي. برنڊ لانگي چيو ته نون ٽيرف جي ڌمڪين اڳ ۾ طئي ٿيل معاهدي کي متاثر ڪيو آهي، تنهنڪري ان کي وڌيڪ نوٽيس تائين معطل ڪيو ويو آهي.
ماهرن جو چوڻ آهي ته معاهدي کي روڪڻ سان ٽرمپ جي ناراضگي جو خطرو آهي، جنهن جي نتيجي ۾ آمريڪا طرفان يورپي درآمدات تي وڌيڪ ٽيرف لاڳو ٿي سگهن ٿا. ٽرمپ انتظاميه واضح ڪيو آهي ته شراب يا اسٽيل تي ٽيرف گهٽائڻ جهڙيون رعايتون صرف تڏهن ممڪن ٿينديون جڏهن معاهدو مڪمل طور لاڳو ٿيندو.
