ڪراچي(ويب ڊيسڪ) پاڪستان اسٽاڪ ايڪسچينج ۾ اڄ به رڪارڊ تيزي جو رجحان ڏسڻ ۾ آيو، جنهن سان انڊيڪس نئين اوچائين تي پهچي ويو.
ڪاروباري هفتي جي مسلسل ٽئين ڏينهن به سيڙپڪارن جو اعتماد برقرار رهيو، جنهن جي نتيجي ۾ اربع جي ڏينهن پي ايس ايڪس ۾ 1704 پوائنٽن جي وڏي تيزي رڪارڊ ڪئي وئي ۽ ڪي ايس اي 100 انڊيڪس وڌي هڪ لک 87 هزار 766 پوائنٽن جي اوچائين تي پهتو.
مارڪيٽ ۾ دورانِ ڪاروبار لاها چاڙها جاري رهيا، جنهن سان انڊيڪس هڪ لک 85 هزار 671 پوائنٽن تائين پهتو، ۽ بعد ۾ 1226 پوائنٽن جي مجموعي تيزي سان ٻيهر وڌي هڪ لک 86 هزار 288 پوائنٽن تي بند ٿيو.
واضح رهي ته هلندڙ هفتي جي پهرين ٻن ڏينهن (سومر ۽ اڱاري) تي به مارڪيٽ ۾ شاندار تيزي ڏسڻ ۾ آئي هئي، جنهن سان انڊيڪس جي اوچائين جا نوان رڪارڊ قائم ٿيا. اقتصادي ماهرن موجب مارڪيٽ ۾ سيڙپڪارن جو اعتماد وڌڻ سان گڏوگڏ مستقبل ۾ به مثبت رجحان برقرار رهڻ جا امڪان آهن.
