واشنگٽن (ويب ڊيسڪ) امريڪي صدر ڊونلڊ ٽرمپ سوشل ميڊيا تي بيان ڏيندي چيو آهي ته چين ۽ روس صرف آمريڪا کان ڊڄن ٿا ۽ ان جي عزت ڪن ٿا، جڏهن ته جيڪڏهن آمريڪا نه هجي ته نيٽو بي وس ٿي پوي ۽ عالمي طاقتون بي خوف ٿي وڃن.
ٽرمپ چيو ته آمريڪا هميشه نيٽو لاءِ موجود رهندو، ڀلي نيٽو آمريڪا لاءِ موجود نه هجي، پر هاڻي شڪ آهي ته ضرورت پوڻ تي نيٽو آمريڪا سان گڏ بيهندو يا نه.
هن نيٽو ملڪن تي تنقيد ڪندي چيو ته گهڻا ملڪ پنهنجي 2 سيڪڙو جي ڊي پي جي ذميواري پوري نه پيا ڪن ۽ آمريڪا سڀني جو بار کڻي رهيو آهي.
ٽرمپ دعويٰ ڪئي ته پنهنجي ڪوششن سان هن ڪجهه ملڪن کي 5 سيڪڙو تائين ادائيگي ڪرڻ تي مجبور ڪيو، جيڪو اڳ ناممڪن سمجهيو ويندو هو.
هن پنهنجي خارجا پاليسي جي ڪاميابين تي روشني وجهندي چيو ته هن اڪيلي 8 جنگيون ختم ڪرايون ۽ لکين زندگيون بچايون، جيڪا حقيقي ڪاميابي آهي.
ٽرمپ چيو ته جيڪڏهن هو موجود نه هجي ها ته روس اڄ سڄي يوڪرين تي قبضو ڪري چڪو هجي.
هن زور ڏنو ته آمريڪا کي ٻيهر عظيم بڻائڻ سندس بنيادي مشن آهي ۽ پهرين مدت ۾ آمريڪي فوج کي مضبوط ڪرڻ جو سلسلو جاري رکيو.
هن ناروي جي امن جي نوبل انعام ۾ نظرانداز ٿيڻ تي به تبصرو ڪيو پر چيو ته ان سان کيس ڪو فرق نٿو پوي.
