ڪراچي(ويب ڊيسڪ) آمريڪي صدر ڊونلڊ ٽرمپ دعويٰ ڪئي آهي ته ايندڙ 18 مهينن اندر آمريڪي آئل ڪمپنيون وينزويلا ۾ مڪمل طور تي فعال ٿي پنهنجو ڪم شروع ڪنديون۔ عالمي خبرن موجب، ٽرمپ جو هي بيان ان وقت سامهون آيو آهي جڏهن 3 جنوري جي رات آمريڪي فوج وينزويلا جي صدارتي محل ۾ گهڙي صدر مادورو ۽ سندس زال کي بيڊ روم مان گرفتار ڪري نيويارڪ منتقل ڪيو۔
اين بي سي نيوز سان ڳالهائيندي صدر ٽرمپ چيو ته وينزويلا جي تيل جي شعبي کي بحال ڪرڻ لاءِ وڏي پيماني تي سيڙپڪاري جي ضرورت آهي، جيڪا آمريڪي آئل ڪمپنيون ڪنديون۔ هن وضاحت ڪئي ته ڪمپنيون پهرين سيڙپڪاري ڪنديون ۽ پوءِ آمريڪي حڪومت يا تيل جي آمدني مان انهن کي رقم واپس ڪئي ويندي۔
بي بي سي جي ڀائيوار اداري سي بي ايس نيوز دعويٰ ڪيو آهي ته ايندڙ ڪجهه ڏينهن ۾ آمريڪي حڪومت ۽ وڏين آئل ڪمپنين جي نمائندن جي وچ ۾ اهم ملاقات جو امڪان آهي۔
توانائي جي ماهرن ٽرمپ جي دعويٰ تي شڪ جو اظهار ڪندي چيو آهي ته وينزويلا جي تيل جي پيداوار بحال ڪرڻ لاءِ ڏهه سالن تائين وقت لڳي سگهي ٿو ۽ ان لاءِ ڏهه اربين ڊالرن جي ضرورت پوندي۔ ماهرن جو چوڻ آهي ته سياسي استحڪام کانسواءِ غير ملڪي ڪمپنيون سيڙپڪاري کان پاسو ڪنديون۔
ياد رهي ته وینزویلا وٽ دنيا جا سڀ کان وڏا ثابت ٿيل تيل ذخيرا، لڳ ڀڳ 303 ارب بيرل، موجود آهن، پر بدانتظامي، پابندين ۽ پراڻين تنصيبات سبب پيداوار انتهائي گهٽجي وئي آهي۔ هتي جو تيل ڳرو نوعيت جو آهي، جنهن کي صاف ڪرڻ مهانگو ۽ ڏکيو ڪم آهي۔ هن وقت صرف آمريڪي ڪمپني شيورون محدود پيماني تي وينزويلا ۾ ڪم ڪري رهي آهي۔
صدر ٽرمپ ۽ نائب صدر جي ڊي وينس دعويٰ ڪئي آهي ته وينزويلا آمريڪي تيل ڦريو هو، جڏهن ته توانائي جي قانوني ماهرن وضاحت ڪئي آهي ته وينزويلا ۾ تيل رياست جي ملڪيت آهي ۽ غير ملڪي ڪمپنيون صرف لائسنس تحت ڪم ڪري سگهن ٿيون۔ وينزوالا 1976 ۾ تيل جو شعبو قومي تحويلي ۾ آندو هو ۽ 2007 ۾ صدر هوگو شاويز غيرملڪي ڪمپنين تي وڌيڪ رياستي ڪنٽرول لاڳو ڪيو هو۔
