اسلام آباد (ويب ڊيسڪ): پاڪستان پيپلز پارٽيءَ جي سينيئر اڳواڻ سيد نويد قمر قومي اسيمبليءَ جي اجلاس ۾ نڪته اعتراض تي ڳالهائيندي چيو آهي ته ڪراچي گل پلازه جي باهه واري واقعي کي 18هين ترميم تي تنقيد ڪرڻ لاءِ استعمال ڪيو ويو. هن چيو ته باهه جي معاملي کي کڻي 18هين ترميم تي حملو ڪيو ويو، جيڪو غير مناسب آهي.
نويد قمر جو چوڻ هو ته مسلم ليگ ن جا پارليماني ليڊر ۽ بچاءَ واري وفاقي وزير خواجه آصف 18هين ترميم بابت ڪجهه ڳالهيون ڪيون آهن، ۽ اسان انهن کي حڪومتي پاليسي بيان سمجهون ٿا. هن چيو ته اڄ ٻيهر هڪ وفاقي وزير 18هين ترميم تي سوال اٿاريا آهن ۽ باهه جي آڙ ۾ ترميم تي تنقيد ڪئي وئي آهي.
پيپلز پارٽي اڳواڻ وڌيڪ چيو ته پاڪستان هڪ وفاقي ملڪ آهي، ڇا حڪومت نئون تجربو ڪرڻ چاهي ٿي؟ نصاب سڄي زندگي غلطين ۽ تاريخي تبديليءَ سان ڀريل رهيو آهي، پر مضبوط پاڪستان مضبوط صوبن مان ئي ٺهي سگهي ٿو. هن چيو ته حڪومت صوبن کي ڏنل وسيلن کي واپس وٺڻ چاهي ٿي، جڏهن ته صحت ۽ تعليم جا وسيلا صوبن کان ڪٽي وفاق کي ڏيڻ سان ملڪ وڌيڪ بحران ۾ ويندو.
نويد قمر چيو ته حڪومت اڃا تائين سٺ ۽ ستر جي ڏهاڪي مان نڪري نه سگهي آهي ۽ پنهنجي سياست لاءِ ملڪ جي مستقبل کي خطري ۾ وجهي رهي آهي. هن زور ڏنو ته صوبن جا حق ۽ وسيلن جو تحفظ ئي ملڪ جي استحڪام جي ضمانت آهي.
