اسلام آباد(ويب ڊيسڪ) قومي اسيمبلي جي اجلاس ۾ بچاءُ واري وفاقي وزير خواجه محمد آصف چيو آهي ته حقيقت ۾ 18هين ترميم ڊھڪوسلو ثابت ٿي آهي. هن زور ڏنو ته 25 ڪروڙ عوام کي بااختيار بڻائڻ لاءِ ملڪ جي وڏن شهرن لاهور، ڪراچي، پشاور ۽ ڪوئيٽا ۾ فعال مڪاني حڪومتن جو نظام قائم ڪرڻ لازمي آهي.
ڪراچي گل پلازه جي باهه ۽ روزانو ٿيندڙ حادثن بابت بحث ۾ حصو وٺندي خواجه آصف چيو ته اهڙن واقعن مان انساني جانين جو وڏو نقصان ٿي رهيو آهي، جڏهن ته ڪراچي جو انتظام سنڀالڻ ڏاڍو ڏکيو ٿي ويو آهي. هن چيو ته عوام کي بااختيار ڪرڻ لاءِ مڪاني حڪومتن جو نظام آڻڻ ضروري آهي، ڇو ته جڏهن تائين گلي محلي ۾ نمائندگي نه هوندي، تڏهن تائين فائر بريگيڊ ۽ ٻين مسئلن جو حل ممڪن نه ٿيندو.
بچاءُ واري وزير ٻڌايو ته 28هين ترميم ۾ مڪاني حڪومتن کي بااختيار بڻائڻ جو موثر سسٽم تجويز ڪيو ويو هو، پر اتفاق راءِ باوجود ان تي عمل نه ٿي سگهيو ۽ ترميم واپس وٺڻي پئي. هن چيو ته نصاب ذريعي قومي سڃاڻپ سان گڏ صوبائيت کي به نئين نسل تائين پهچائڻ جي ڪوشش ڪئي وئي هئي، پر اها ترميم به ڊراپ ٿي وئي.
خواجه آصف وڌيڪ چيو ته پاڪستان ۾ ايوب خان، ضياء الحق ۽ پرويز مشرف جي دور ۾ به مڪاني حڪومتن جو نظام موجود رهيو ۽ باقاعده چونڊون ٿينديون رهيون. هن تنقيد ڪندي چيو ته موجوده دور ۾ نه چونڊون ڪرايون وڃن ٿيون ۽ جيڪڏهن شيڊول اچي به وڃي ته صوبائي حڪومتون اختيارتن جي هيٺين سطح تي منتقلي جي مخالفت ڪن ٿيون.
هن مثال ڏيندي چيو ته چين جي صدر شي مڪاني حڪومتن مان اڳتي وڌي حڪومتي سطح تي پهتو، جڏهن ته ترڪي ۽ ٻين ترقي يافته ملڪن ۾ به فعال مڪاني حڪومتن جو نظام موجود آهي. بچاءُ واري وزير تجويز ڏني ته آئين ۾ ترميم ڪري هڪجهڙو نصاب ۽ فعال مڪاني حڪومتن جو نظام آڻڻ گهرجي.
