ڪراچي (ويب ڊيسڪ) انٽرنيشنل ڪرڪيٽ ڪائونسل (آءِ سي سي) ٽي ٽوئنٽي ورلڊڪپ 2026 ۾ بنگلاديش جي جاءِ تي اسڪاٽ لينڊ کي شامل ڪرڻ جو فيصلو ڪري ڇڏيو آهي۔
ڀارتي ميڊيا رپورٽن موجب، بنگلاديش ٽيم طرفان ڀارت ۾ کيڏڻ کان انڪار ڪرڻ بعد آءِ سي سي اسڪاٽ لينڊ کي ٽورنامينٽ ۾ جاءِ ڏئي ڇڏي۔ هي فيصلو ان وقت سامهون آيو آهي جڏهن آءِ سي سي ڪجهه ڏينهن اڳ بنگلاديش ڪرڪيٽ بورڊ کي 24 ڪلاڪن جي مهلت ڏني هئي، پر مقرر وقت اندر معاملا حل نه ٿي سگهيا ۽ آخرڪار آءِ سي سي حتمي قدم کنيو۔
ذريعن موجب، آءِ سي سي جي چيف ايگزيڪيوٽو آءِ سي سي بورڊ کي لکيل خط ۾ واضح ڪيو ته بنگلاديش جا مطالبا پاليسي جي خلاف آهن ۽ بورڊ جي فيصلي تي عملدرآمد ۾ ناڪام رهيا، جنهن بنياد تي اسڪاٽ لينڊ کي ٽورنامينٽ ۾ شامل ڪرڻ جو اعلان ڪيو ويو۔ اهو خط بنگلاديش ڪرڪيٽ بورڊ جي صدر امين الاسلام کي به موڪليو ويو، جيڪو آءِ سي سي بورڊ جو ميمبر آهي۔
ساڳئي وقت آءِ سي سي طرفان ڪرڪيٽ اسڪاٽ لينڊ کي باضابطه دعوت نامو به موڪليو ويو آهي، پر اسڪاٽ لينڊ جي چيف ايگزيڪيوٽو جو ردعمل اڃا تائين سامهون نه آيو آهي۔
ذريعن جو چوڻ آهي ته اسڪاٽ لينڊ کي هي موقعو ماضي جي آءِ سي سي ايونٽس ۾ ڪارڪردگي ۽ موجوده عالمي درجا بندي (14هين نمبر) جي بنياد تي ڏنو ويو آهي۔ 2024 جي ورلڊڪپ ۾ اسڪاٽ لينڊ گروپ بي ۾ ٽئين پوزيشن تي رهيو هو، جڏهن ته 2021 ۾ اسڪاٽ لينڊ بنگلاديش کي شڪست ڏئي سڀني کي حيران ڪري ڇڏيو هو۔
