ڪراچي (ويب ڊيسڪ) پاڪستان ڪرڪيٽ بورڊ (پي سي بي) جي چيئرمين محسن نقوي چيو آهي ته ٽي ٽوئنٽي ورلڊ ڪپ ۾ ٽيم موڪلڻ جو فيصلو سڀاڻي وزيراعظم جي صلاح مشوري کان پوءِ ٿيندو. پي سي بي آءِ سي سي جي ٻٽي معيار کي رد ڪري ڇڏيو آهي، اسان ڪرڪيٽ جي اصولن کي نظر ۾ رکندي بنگلاديش جي حمايت ڪئي.
چيئرمين پي سي بي محسن نقوي رانديگرن سان ڳالهائيندي چيو ته حڪومت جيڪو فيصلو ڪندي، ان تي مڪمل عمل ڪنداسين. سياست سان ڀريل ڪرڪيٽ ڪنهن جي فائدي ۾ ناهي، سڀني کي ڪرڪيٽ جي اصولن تي هلڻ گهرجي.
سربراهه پي سي بي وڌيڪ چيو ته اسان جا رانديگر باصلاحيت آهن ۽ هر لحاظ سان مقابلو ڪرڻ ڄاڻن ٿا. ڪنهن به ميدان ۾ ڪاميابي ٽيم ورڪ سان حاصل ٿيندي آهي.
واضح رهي ته محسن نقوي جي سڀاڻي وزيراعظم شهباز شريف سان ملاقات جو امڪان آهي، جنهن ۾ ٽي ٽوئنٽي ورلڊ ڪپ بابت صلاح مشورو ٿيندو. هن سلسلي ۾ محسن نقوي وڌيڪ چيو ته ٽيم موڪلڻ جو فيصلو وزيراعظم جي صلاح کان پوءِ ٿيندو. رانديگرن جو چوڻ هو ته اسان سڀ پي سي بي جي اصولي موقف سان گڏ آهيون.
