مارسٽن روڊ ۽ ڀرپاسي ۾ 11 ڏينهن کان گيس بند، متاثر خاندان سلينڊرن تي گذارو ڪرڻ تي مجبور
ڪراچي، پاڪستان – ويب ڊيسڪ: گل پلازا ۾ پيش آيل خوفناڪ آتشزدگي واري واقعي کانپوءِ مارسٽن روڊ ۽ ان جي ڀرپاسي وارن علائقن ۾ گذريل 11 ڏينهن کان گيس جي فراهمي مڪمل طور معطل آهي، جنهن سبب هزارين گهر سخت تڪليفن کي منهن ڏئي رهيا آهن.
علائقي جي رهواسين موجب، آتشزدگي واري ڏينهن کان وٺي سڄي علائقي ۾ گيس بند آهي، جنهن سبب روزاني زندگي بري طرح متاثر ٿي آهي. اندازي مطابق لڳ ڀڳ 10 هزار گهر گيس بندش سبب متاثر آهن، جڏهن ته شهري مهانگا گيس سلينڊر خريد ڪري گذارو ڪرڻ تي مجبور آهن.
رهواسي گيس جا بل کڻي ڊپٽي ڪمشنر جي آفيس به پهتا، جتي هنن احتجاج ڪندي چيو ته سوئي گيس ڪمپني سان بار بار شڪايتن باوجود گيس بحال نه ڪئي وئي آهي. سوئي گيس اختيارين جو چوڻ آهي ته ڊپٽي ڪمشنر آفيس کان اجازت ملڻ کان سواءِ گيس جي فراهمي بحال نٿي ٿي سگهي.
علائقي واسين اعليٰ حڪام کان اپيل ڪئي آهي ته مارسٽن روڊ ۽ ڀرپاسي وارن علائقن ۾ گيس جي فراهمي فوري طور بحال ڪئي وڃي، جيئن شهري سڪون جو ساهه کڻي سگهن.
