ڪراچي (ويب ڊيسڪ) اسرائيل ۽ آمريڪا جي گڏيل حملي کان پوءِ ايران طرفان به جوابي حملا جاري آهن، پر اسرائيل جي تازي حملي ۾ ايران جو سپريم ليڊر آيت الله خامنه اي شهيد ٿي ويو، جنهن جي تصديق ايران جي سرڪاري ميڊيا ڪئي آهي.
ايراني سرڪاري ميڊيا موجب، شهادت جي وقت سپريم ليڊر پنهنجي آفيس ۾ موجود هئا۔ ايران ۾ 40 ڏينهن جو سوڳ ۽ 7 ڏينهن جي عام موڪل جو اعلان ڪيو ويو آهي۔
آيت الله خامنه اي جي شهادت تي عراق جي مقدس روضن تي انقلاب جي علامت طور ڳاڙهيون بتيون روشن ڪيون ويون۔ رپورٽن موجب، مشهد ۾ حرم امام رضا جي گنبذ تي ڪارو جهنڊو لڙڪايو ويو، جيڪو روايتي مذهبي سوڳ جي علامت آهي۔
مشهد ۾ سوڳ جو ماحول آهي ۽ عوام وڏي تعداد ۾ گڏ ٿي ويا آهن۔ حرم امام رضا مان جاري ٿيل وڊيو ۾ ڪيترائي ماڻهو ڏک ۾ نڊھال ٿي زمين تي ويٺل نظر اچن ٿا۔
ايراني پاسداران انقلاب چيو آهي ته جلد ئي ايران جي تاريخ جو سڀ کان تباهه ڪن ۽ جارحاڻو آپريشن شروع ٿيندو.
ايراني رياستي ٽي وي علي شمخاني ۽ پاسداران انقلاب اسلامي جي ڪمانڊر پاڪپور جي شهادت جي به تصديق ڪئي آهي۔ بريگيڊيئر جنرل احمد وحيدي کي نئون ڪمانڊر ان چيـف مقرر ڪيو ويو آهي۔
ان کان اڳ ايران جي سرڪاري ميڊيا ٻڌايو هو ته حملي ۾ سپريم ليڊر جي ڌيءَ، نياڻي، داماد ۽ ٻهُ شهيد ٿيا.
عرب ميڊيا دعويٰ ڪئي آهي ته ايران دبئي انٽرنيشنل ايئرپورٽ کي نشانو بڻايو، جنهن ۾ ٽرمينل 3 ۾ دونهن ڀرجي ويو ۽ گهٽ ۾ گهٽ 4 ماڻهو زخمي ٿيا۔
ساڳئي وقت ايران اسرائيل تي به حملو ڪيو، جنهن ۾ تل ابيب ۾ وزارت دفاع جي عمارت کي نشانو بڻايو ويو. حملي ۾ هڪ شخص مارجي ويو ۽ 21 زخمي ٿيا۔
اسرائيلي وزيراعظم دعويٰ ڪئي آهي ته حملي ۾ سپريم ليڊر خامنه اي ۽ ٻين اڳواڻن کي شهيد ڪيو ويو ۽ سندن خفيه ڪمپائونڊ مڪمل طور تباهه ڪيو ويو۔
ان کان پوءِ آمريڪي صدر به چيو آهي ته آيت الله خامنه اي هاڻي زنده نه رهيو، ۽ ايراني عوام کي اپيل ڪئي ته هو اڳتي وڌي پنهنجو ملڪ حاصل ڪن.
وچ اوڀر جي تيزي سان بدلجندڙ صورتحال سبب گڏيل قومن ۾ سلامتي ڪائونسل جو هنگامي اجلاس شروع ٿي ويو، جنهن ۾ روس ۽ چين سميت ڪيترن ئي ملڪن آمريڪا ۽ اسرائيل جي حملي جي مذمت ڪئي.
اقوام متحده جي سيڪريٽري جنرل چيو آهي ته آيت الله خامنه اي جي شهادت جي في الحال تصديق نه ٿي سگهي آهي.
ٻئي طرف ايران آمريڪا ۽ اسرائيل جي دعويٰ کي سختي سان رد ڪندي چيو آهي ته سپريم ليڊر محفوظ آهن.
اسرائيلي وزير دفاع چيو آهي ته گذريل ڏينهن آمريڪا ۽ اسرائيل گڏيل حملو ڪيو، جنهن ۾ آمريڪي فضائيه حصو ورتو۔ حملي کان پوءِ تهران ۾ 3 زورائتا ڌماڪا ٻڌا ويا.
بوشهر تي به حملي جون خبرون آهن ۽ ان کان پوءِ ايراني نيوي کي هاءِ الرٽ ڪيو ويو آهي.
ان کان علاوه، لڳ ڀڳ 20 آمريڪي ۽ اسرائيلي فائٽر جيٽس شام جي علائقي دارا مٿان پرواز ڪندي ايران ڏانهن روانا ٿيا.
