متاثرين کي محفوظ هنڌن تي منتقل ڪيو ويو آهي ۽ انهن جي کاڌي، علاج ۽ جانورن جي سنڀال لاءِ مڪمل انتظام ڪيا ويا آهن
ڪراچي: سنڌ جي اطلاعات واري وزير شرجيل انعام ميمڻ چيو آهي ته حڪومت قدرتي آفتن ۽ هنگامي حالتن ۾ ماڻهن کي هر ممڪن امداد فراهم ڪرڻ لاءِ ڏينهن رات ڪم ڪري رهي آهي، متاثر ماڻهن کي اڪيلو نه ڇڏيو ويندو. پنهنجي بيان ۾ هن چيو ته امدادي ڪارروائي دوران متاثرين کي نه رڳو محفوظ هنڌن تي منتقل ڪيو پيو وڃي پر انهن جي کاڌي، علاج ۽ جانورن جي سنڀال لاءِ به مڪمل انتظام ڪيا ويا آهن. شرجيل ميمڻ چيو ته لاگو ۽ سکر ۾ ٻوڏ جي سطح وڌيڪ آهي جڏهن ته ڪوٽڙي بئراج تي ٻوڏ جي سطح گهٽ آهي. گڊو بئراج تي پاڻي جي آمد 624,456 ۽ اخراج 594,936 ڪيوسڪ هو، سکر تي آمد 560,890 ۽ اخراج 588,830 ڪيوسڪ هو، جڏهن ته ڪوٽڙي ۾ آمد 284,325 ۽ اخراج 273,170 ڪيوسڪ هو. گذريل 24 ڪلاڪن ۾ 3,522 ماڻهن کي محفوظ هنڌن تي منتقل ڪيو ويو، جنهن سان هاڻي تائين منتقل ٿيندڙن جو ڪل تعداد 173,027 ٿي ويو آهي، جن مان 469 ماڻهو اڃا تائين رليف ڪئمپن ۾ رهائش پذير آهن. اطلاعات واري وزير وڌيڪ چيو ته صوبي ۾ 183 فڪسڊ ۽ موبائل هيلٿ سائيٽون ڪم ڪري رهيون آهن جتي ڪالهه 4,174 کان وڌيڪ مريضن جو علاج ڪيو ويو، اهڙي طرح، هاڻي تائين ڪل 92,958 ماڻهن کي علاج جون سهولتون مليون آهن. هن وڌيڪ چيو ته سنڌ حڪومت جانورن جي حفاظت لاءِ پڻ قدم کنيا آهن. ڪالهه، 3,192 ڍورن کي محفوظ هنڌن تي منتقل ڪيو ويو، جنهن کان پوءِ هاڻي تائين 450,571 ڍورن کي محفوظ بڻايو ويو آهي. ساڳئي عرصي دوران، 39,589 ڍورن کي ويڪسين ۽ طبي سهولتون فراهم ڪيون ويون، جڏهن ته هاڻي تائين ڪل 1,355,573 ڍورن جو علاج ۽ ويڪسينيشن ڪئي وئ آهي.
