نوشهروفيروز :رپورٽ مقصود علي مشوري
نوشهروفيروز ۾ ميونسپل ڪميٽي جي ملازمن پاران پنجين ڏينهن به مطالبن احتجاج جاري رکيو ويو مظاهرين ڪشن راجہ ، مولابخش شيخ، عمران راڄپر، قلندر بخش شيخ ۽ ٻين جي اڳواڻي ۾ پريس ڪلب آڏو حقن جي حاصلات لاءِ نعريبازي به ڪئي.
ان موقعي تي ميڊيا سان ڳالهائيندي ملازمن چيو ته چيئرمين ميونسپل ڪميٽي ڊاڪٽر ڪاشف ميمڻ ۽ سي ايم او عبدالفتاح تڳر اسان ملازمن جي سرڪار پاران وڌايل پگهار ڏيڻ لاءِ تيار نه آهي ۽ رٽائرڊ ملازمن کي پينشن به اڻپوري ڏين ٿا جڏهن ته ڊفرنس به نه ٿو ڏنو وڃي جيڪا وڏي زيادتي آهي هنن چيو ته جائز حق گهرڻ تي چيئرمين ۽ سي ايم او اسان جا جائز مطالبا تسليم ڪرڻ بجاءِ ملازم دشمن ڪاروائيون ڪري رهيو آهي جيڪو عمل برداشت جوڳو ناهي اسان پر امن احتجاج ڪري رهيا آهيون پهريون پنهنجي ڊيوٽي ڪيون ٿا پوءِ جائز مطالبن جي مڃتا احتجاج ڪريون ٿا هنن چتاءُ ڏنو ته جي ڪڏهن جائز حق نه ملن ته احتجاج کي سخت ڪيو ويندو. ٻئي طرف ميونسپل ڪميٽي جي چيئرمين ڊاڪٽر ڪاشف ميمڻ پريس ڪانفرنس ڪندي چيو آهي ته ميونسپل ڪميٽي جي ملازمن جا جائز مسئلا حل ڪيا ويندا باقي ڊيوٽي چور گوسڙو ملازمن کي ڪابه رعايت نه ڏني ويندي هن چيو ته ملازمن جي پگهار هر مهيني وقت سر سندن اڪائونٽ ۾ ويندي آهي ڪنهن هڪ ملازم جي پگهار به بند ناهي ڪئي نه ئي ڪا ڪٽوتي ڪئي آهي پينشن به رٽائرڊ ملازمن کي ملي رهي آهي ملازم پگهار به کڻڻ ٿا پر ڊيوٽي نه ٿا ڪن جن جي اهڙي عمل سان شهر جي صفائي متاثر ٿئي ٿي هن چيو ته ڊيوٽي چور گوسڙو ملازمن جا مفاد پورا ٿيڻ نه ڏينداسين جيڪو ڊيوٽي نه ڪندو ان کي قانون موجب ڪارروائي کي منهن ڏيڻ پوندو.
