پشاور(ويب ڊيسڪ) ڪي پي جي وڏي وزير علي امين گنڊاپور چيو آهي ته هو عدليه کي پيغام ڏئي رهيو آهي ته آئين مطابق انصاف تي ٻڌل فيصلا ڪري، آئين جي پاسداري هن ملڪ ۾ هر ڪنهن جو فرض آهي.
پشاور ۾ پي ٽي آءِ جي هڪ عوامي جلسي کي خطاب ڪندي ڪي پي جي وڏي وزير چيو ته باني پي ٽي آءِ جي جنگ حقيقي آزادي جي جنگ آهي، اڄ اسان هن عدليه کي هدايت ڪريون ٿا ته انصاف مطابق فيصلا ڪري، آئين جي پاسداري هن ملڪ ۾ هر ڪنهن جو فرض آهي، اسان آئين لاءِ آواز بلند ڪيو آهي ۽ ان کي بلند ڪندا رهنداسين، هن ملڪ ۾ سڀ کان وڌيڪ انساني حقن جي خلاف ورزي ڪئي وئي.
هن چيو ته ڀارت سان جنگ ۾ باني پي ٽي آءِ واضح ڪيو ته سڄي قوم گڏ بيٺي آهي، خيبرپختونخواهه حڪومت آپريشن جي حق ۾ ناهي.
هن وڌيڪ چيو ته حقيقي آزادي عمران خان جو خواب آهي، هو عدليه کي پيغام ڏئي رهيو آهي ته آئين مطابق انصاف ڏنو وڃي.
انهيءَ دوران، پنڊال ۾ موجود ڪارڪنن وڏي وزير خلاف نعريبازي شروع ڪئي ۽ سندس خطاب ٻڌڻ کان انڪار ڪيو. ڪارڪنن وڏي وزير خلاف احتجاج ڪيو، پنڊال ۾ بوتلون اڇلائڻ شروع ڪيون، نه نه جا نعرا هنيا، پر ان جي باوجود، وڏي وزير پنهنجو خطاب جاري رکيو.
پي ٽي آءِ اڳواڻ جنيد اڪبر جلسي کي پنهنجي خطاب ۾ چيو ته ڪي پي اڳ به پي ٽي آءِ جو هو ۽ اڄ به آهي. اسان باني پي ٽي آءِ لاءِ ماڻهن جا هٿ ڪٽي ڇڏينداسين. اسان ڪرسين تي ويهڻ وارن کان رت جي هر قطري جو حساب وٺنداسين. جيڪو به خان سان وفادار نه آهي، مان ان لاءِ زمين تنگ ڪري ڇڏيندس.
هن چيو ته اسان ڪنهن به حالت ۾ آپريشن کي قبول نٿا ڪريون.
