لاهور: وزيراعليٰ پنجاب مريم نواز چيو آهي ته جڏهن سيلاب جي آفت آئي ته پنجاب جي زخمن تي لوڻ ڇٽيو ويو، مان جڏهن “پنهنجو پاڻي” چوندي آهيان ته ان جو مطلب پنجاب جو پاڻي هوندو آهي، نه ته ذاتي ملڪيت.
لاهور ۾ اليڪٽرڪ بس منصوبو جي افتتاحي تقريب دوران خطاب ڪندي مريم نواز چيو ته هي بسون عوام لاءِ تحفو آهن، جن جو ڪرايو رڳو 20 رپيا رکيو ويو آهي، بسون انٽرنيٽ جي سهولت سان ليس آهن، جڏهن ته بزرگن ۽ خاص ماڻهن لاءِ سفر مفت هوندو. هن اعلان ڪيو ته لاهور ۾ وڌيڪ اليڪٽرڪ بسون پڻ فراهم ڪيون وينديون.
وزيراعليٰ چيو ته کيس چيو ويو ته “پنهنجو پاڻي” جو مطلب ذاتي پاڻي آهي، پر وضاحت ڪندي هن چيو ته اها ڳالهه پنجاب جي وسيلن بابت آهي، نه ته ذاتي مفاد جي.
مريم نواز ٻڌايو ته جڏهن کيس خبر پئي ته خيبرپختونخوا ۾ ڪلائوڊ برسٽ سبب 500 ماڻهو فوت ٿيا، ته هن ٿائيلينڊ مان علي امين گنڊاپور کي فون ڪري پڇيو ته پنجاب ڪهڙي مدد ڪري سگهي ٿو؟ پر جڏهن آفت پنجاب تي آئي ته بجاءِ سهڪار جي، زخم تي لوڻ ڇٽيو ويو ۽ امدادي ڪارروائين دوران پريس ڪانفرنس ۾ مذاق اڏايو ويو.
هن چيو ته کيس چيو ويو ته عالمي ادارن کان مدد ڇو نه گهري؟ پر جڏهن عوام جي خدمت جي نيت هجي ته ڪنهن جي آڏو هٿ ڦهلائڻ جي ضرورت نه پوي. هن زور ڏنو ته خيبرپختونخوا جا عوام به اسان جا ئي آهن، پر ماڻهن کي گمراهه ڪري پنجاب خلاف اڀاريو ويو، جيڪو عصبيت آهي.
