اسلام آباد (ويب ڊيسڪ) سعودي عرب، پاڪستان، اردن، متحده عرب امارات، انڊونيشيا، ترڪي، قطر ۽ مصر جي پرڏيهي وزيرن گڏيل بيان جاري ڪندي غزه امن منصوبي بابت حماس جي هاڪاري ردعمل جي آجيان ڪئي آهي، جيڪو آمريڪي صدر ڊونلڊ ٽرمپ جي تجويز تي ٻڌل آهي.
پرڏيهي وزارت طرفان صدر ٽرمپ جي اسرائيل کي فوري بمباري بند ڪرڻ جي اپيل جي پڻ واکاڻ ڪئي وئي، جڏهن ته قيدي مٽاسٽا جي معاهدي تي عملدرآمد جي شروعات جي مطالبي کي به اهم قرار ڏنو ويو.
بيان ۾ چيو ويو ته هي اڳڀرائي خطي ۾ جنگ بندي جي حصول لاءِ مثبت ثابت ٿي سگهي ٿي، جيڪا غزه ۾ انساني بحران کي منهن ڏيڻ لاءِ هڪ اهم موقعو فراهم ڪري ٿي.
پرڏيهي وزارت حماس جي ان اعلان جي پڻ ساراهه ڪئي ته غزه جو انتظام ٽيڪنوڪريٽس تي مشتمل عبوري انتظامي ڪميٽي حوالي ڪرڻ لاءِ تيار آهن.
پرڏيهي وزارت جي ترجمان موجب، پرڏيهي وزيرن تجويز تي عملدرآمد جي طريقيڪار تي اتفاق ڪرڻ جي ضرورت تي زور ڏنو، ۽ سمورن معاملن جي حل لاءِ فوري ڳالهين جي شروعات جي اپيل ڪئي.
بيان ۾ وڌيڪ چيو ويو ته جنگ جي فوري خاتمي، انساني امداد جي فراهمي ۽ فلسطيني عوام جي بي دخلي کان بچاءَ کي يقيني بڻايو وڃي. ساڳئي وقت، اهڙن قدمن کان پاسو ڪرڻ جي اپيل ڪئي وئي جيڪي فلسطيني شهرين جي تحفظ کي خطري ۾ وجهي سگهن.
پرڏيهي وزير فلسطيني اختيارين جي غزه واپسي، غزه ۽ اولهندي ڪناري جي اتحاد، سڪيورٽي نظام جي قيام، اسرائيلي فوج جي مڪمل انخلا ۽ غزه جي ٻيهر تعمير تي زور ڏنو.
ترجمان موجب، پرڏيهي وزيرن ٻن رياستن جي حل جي بنياد تي منصفاڻو امن قائم ڪرڻ جي حمايت جو اظهار ڪيو.
