غزه (ويب ڊيسڪ) فلسطيني مزاحمتي تنظيم حماس آمريڪي صدر ڊونلڊ ٽرمپ جي 20 نڪاتي امن منصوبي تي خدشن جو اظهار ڪندي ان ۾ اهم ترميمون آڻڻ جو مطالبو ڪيو آهي.
فلسطيني ذريعن موجب، حماس چاهي ٿي ته اسرائيل غزہ مان مڪمل طور تي واپس وڃي ۽ عالمي سطح تي ان ڳالهه جي ضمانت ڏني وڃي ته حماس جي اڳواڻن کي قتل نه ڪيو ويندو. تنظيم طرفان منصوبي تي باضابطه جواب ڏيڻ لاءِ ٻن کان ٽن ڏينهن جي مهلت طلب ڪئي وئي آهي.
حماس جي ڳالهيون ڪندڙ وفد دوحا ۾ ترڪ، مصري ۽ قطري اختيارين سان ملاقاتون ڪيون، جتي منصوبي جي “غير مسلح ڪرڻ” واري شق تي سخت اختلاف سامهون آيا.
واضح رهي ته صدر ٽرمپ پاران پيش ڪيل امن منصوبي تحت حماس کي مڪمل طور تي غير مسلح ڪرڻ ۽ مستقبل جي حڪومت ۾ ڪو به سياسي ڪردار نه ڏيڻ جي تجويز شامل آهي، جڏهن ته پرامن رهندڙن لاءِ عام معافي جي تجويز پڻ ڏني وئي آهي.
ان منصوبي تي ردعمل ڏيندي اسرائيلي وزيراعظم بنيامين نيتن ياهو چيو هو ته اسرائيلي فوج غزہ جي اڪثر علائقن ۾ موجود رهندي.
مبصرن جو چوڻ آهي ته حماس جي خدشن ۽ ترميمي مطالبن سان امن منصوبي تي عملدرآمد جي راهه ۾ نوان چئلينج پيدا ٿي سگهن ٿا، جڏهن ته علائقائي ۽ عالمي سطح تي سفارتي سرگرميون تيزي سان جاري آهن.
