واشنگٽن (ويب ڊيسڪ) آمريڪي صدر ڊونلڊ ٽرمپ چيو آهي ته اسرائيل ۽ حماس جي وچ ۾ غزہ جنگ بندي معاهدي لاءِ هڪ حقيقي موقعو موجود آهي، ۽ مشرقِ وسطى ۾ امن جي بحالي جون ڪوششون هاڻ فيصلائتي مرحلي تي پهچي چڪيون آهن.
صدر ٽرمپ وائٽ هائوس ۾ ڪينيڊين وزيراعظم مارڪ ڪارني سان ملاقات دوران ميڊيا سان ڳالهائيندي چيو ته آمريڪا مشرقِ وسطى ۾ امن جي هڪ وڏي معاهدي جي ويجهو آهي، جيڪو غزہ کان اڳتي خطي ۾ به مثبت تبديليون آڻي سگهي ٿو.
عرب ميڊيا موجب، صدر ٽرمپ تصديق ڪئي ته آمريڪي ڳالهين ڪندڙ هن وقت مصر ۾ جاري بالواسطه ڳالهين جو حصو آهن، جتي اسرائيل ۽ حماس جي وچ ۾ جنگ بندي لاءِ ڪوششون جاري آهن.
وائٽ هائوس جي ترجمان موجب، صدر ٽرمپ جا خاص نمائندا اسٽييو وٽڪوف ۽ داماد جيرڊ ڪشنر به ڳالهين جي عمل ۾ شامل آهن.
صدر ٽرمپ وڌيڪ چيو ته آمريڪا چاهي ٿو ته يرغمالي ماڻهن جي فوري آزادي عمل ۾ آڻي وڃي. هن ٻڌايو ته آمريڪي ٽيم هن وقت به مصر ۾ موجود آهي، جڏهن ته ٻي ٽيم روانه ٿي چڪي آهي، ۽ دنيا جا ڪيترائي ملڪ هن منصوبي جي حمايت ڪري رهيا آهن.
صدر ٽرمپ اميد ظاهر ڪئي ته جيڪڏهن اسرائيل ۽ حماس جنگ بندي تي راضي ٿي وڃن ته آمريڪا يقيني بڻائيندو ته سڀئي ڌريون معاهدي جي مڪمل پاسداري ڪن.
