واشنگٽن / دوحه: آمريڪي صدر ڊونلڊ ٽرمپ هڪ نئون ايگزيڪيوٽو آرڊر جاري ڪندي اعلان ڪيو آهي ته جيڪڏهن قطر تي ٻيهر ڪنهن به ملڪ طرفان حملو ڪيو ويو ته ان کي آمريڪا تي حملو تصور ڪيو ويندو، ۽ آمريڪا نه صرف قطر جو دفاع ڪندو پر جوابي فوجي ڪارروائي به ڪندو.
9 سيپٽمبر تي قطر جي سرزمين تي اسرائيل پاران فضائي حملو ڪيو ويو، جنهن ۾ حماس جي قيادت کي نشانو بڻايو ويو. ان حملي ۾ 6 ڄڻا شهيد ٿيا، جن ۾ هڪ قطري گارڊ، حماس اڳواڻ الخليل الحيا جو پٽ، سندس آفيس جو انچارج ۽ ٽي حماس جا محافظ شامل هئا.
عالمي خبرن موجب، قطر ان حملي کي پنهنجي خودمختياري ۽ قومي سلامتي جي خلاف قرار ڏيندي غزه امن ڳالهين ۾ ثالثي جو ڪردار ادا ڪرڻ کان انڪار ڪري ڇڏيو. ان صورتحال تي صدر ٽرمپ پنهنجي پرڏيهي وزير کي قطر ۽ اسرائيل جي دوري تي موڪليو، جنهن کانپوءِ قطر ثالثي لاءِ رضامندي ظاهر ڪئي.
ان کانپوءِ جڏهن اسرائيلي وزيراعظم نيتن ياهو آمريڪي دوري تي پهتو، ته صدر ٽرمپ سندس قطري هم منصب سان ٽيليفون تي ڳالهه ٻولهه ڪرائي. ان ڳالهه ٻولهه دوران نيتن ياهو قطري گارڊ جي موت تي افسوس جو اظهار ڪندي معذرت ڪئي ۽ اهڙي واقعي جي ورجاءُ نه ٿيڻ جي خاطري ڏني.
صدر ٽرمپ اميرِ قطر کي به قومي سلامتي بابت خاطريون ڏنيون ۽ نئون حڪم نامو جاري ڪيو، جنهن ۾ چيو ويو ته آمريڪا ۽ قطر جي وچ ۾ ويجهو تعاون، گڏيل مفاد ۽ فوجي لاڳاپا موجود آهن. قطر هڪ پُرعزم اتحادي آهي، جيڪو امن، استحڪام ۽ خوشحالي لاءِ آمريڪا سان گڏ بيٺو آهي.
وائيٽ هائوس طرفان جاري بيان ۾ واضح طور چيو ويو آهي ته هاڻ قطر تي ٿيندڙ ڪنهن به حملي کي آمريڪا تي حملو سمجهيو ويندو.
اسرائيل دعويٰ ڪئي آهي ته دوحه تي حملو حماس اڳواڻ الخليل الحيا کي نشانو بڻائڻ لاءِ ڪيو ويو، جنهن مبينا طور تي 7 آڪٽوبر 2023 تي اسرائيل تي حملو ڪرڻ جي منصوبي بندي ڪئي هئي.
