واشنگٽن (ويب ڊيسڪ) آمريڪي صدر ڊونلڊ ٽرمپ عالمي تڪرارن جي حل بابت هڪ ڀيرو ٻيهر پنهنجو اعتماد ظاهر ڪندي چيو آهي ته جيڪڏهن هو چاهين ته پاڪستان ۽ افغانستان وچ ۾ هلندڙ تڪرار کي ختم ڪرائڻ تمام آسان آهي.
يوڪريني صدر زيلينسڪي سان ملاقات کان اڳ ڳالهائيندي صدر ٽرمپ چيو ته روسي صدر ولاديمير پيوٽن سان هنگري ۾ ٿيندڙ ملاقات “ٻٽي ملاقات” هوندي، جنهن ۾ جنگ بندي تي ڳالهه ٻولهه ٿيندي. هن چيو ته هو زيلينسڪي سان به رابطي ۾ رهندا ۽ سندن خيال آهي ته پيوٽن ۽ زيلينسڪي ٻئي جنگ جو خاتمو چاهين ٿا.
صدر ٽرمپ جو چوڻ هو ته ڀارت هاڻ روس کان تيل نه خريد ڪندو، جڏهن ته مشرقِ وسطىٰ جو معاملو يوڪريني تڪرار کان به وڌيڪ پيچيده آهي. هن دعويٰ ڪئي ته مشرقِ وسطىٰ ۾ 59 ملڪن کي گڏ ڪري هڪ موقف تي متفق ڪرڻ سندن وڏي ڪاميابي هئي.
هن چيو ته آمريڪا يوڪريني فوج کي ٽوماهاڪ ميزائل ۽ ٻين هٿيارن جي فراهمي جاري رکيو آهي، پر اميد آهي ته جنگ جو خاتمو بنا ٽوماهاڪ جي به ممڪن ٿيندو. صدر ٽرمپ موجب، “اسان جنگ ختم ڪرڻ جي تمام ويجهو آهيون.”
صدر ٽرمپ پنهنجي اڳوڻين ڪاميابين جو ذڪر ڪندي چيو ته “مون ڀارت ۽ پاڪستان جي وچ ۾ جنگ روڪائي، اٺ جنگون روڪيون، جڏهن ته ڪنهن به آمريڪي صدر هڪ به جنگ نه روڪائي.” هن وڌيڪ چيو ته پاڪستاني وزيراعظم سندن ڪردار کي ساراهيندي چيو ته جنگ روڪائي لکين زندگيون بچايون ويون.
صدر ٽرمپ واضح ڪيو ته هو نوبل انعام لاءِ نه، پر انساني زندگيون بچائڻ لاءِ جنگون روڪائي رهيو آهي. هن دعويٰ ڪئي ته پاڪستان هاڻ افغانستان جي اندر ڪارروائيون ڪري رهيو آهي، ۽ جيڪڏهن هو چاهين ته پاڪ-افغان تڪرار جو خاتمو تمام آسان آهي.
ٻئي طرف، يوڪريني صدر زيلينسڪي چيو آهي ته غزه ۾ جنگ بندي کانپوءِ هاڻ صدر ٽرمپ وٽ روس-يوڪريني تڪرار ختم ڪرڻ جو موقعو موجود آهي. هن ٻڌايو ته آمريڪي توانائي ڪمپنين سان ملاقاتون ٿيون آهن، جيڪي يوڪريني انفراسٽرڪچر تي حملن کانپوءِ مدد لاءِ تيار آهن.
زيلينسڪي جو چوڻ هو ته “اسان امن چاهيون ٿا، پر پيوٽن نه ٿو چاهي، ان تي دٻاءُ وجهڻ جي ضرورت آهي.”
