اسلام آباد (ويب ڊيسڪ) – وزيراعظم شهباز شريف چيو آهي ته پاڪستان ۽ سعودي عرب جي وچ ۾ ٿيل دفاعي معاهدي کان پوءِ هاڻ ٻنهي ملڪن جا لاڳاپا واپار ۽ سيڙپڪاري جي بنياد تي وڌيڪ مضبوط ڪيا ويندا، جڏهن ته سعودي عرب ان سلسلي ۾ هر ممڪن مدد لاءِ تيار آهي.
وزيراعظم هائوس ۾ سعودي عرب مان آيل اعليٰ سطحي وفد جي اعزاز ۾ ظهراڻي جي تقريب منعقد ڪئي وئي، جنهن دوران وزيراعظم شرڪت ڪندڙن سان خطاب ڪندي چيو ته “اسين هتي هڪ خاندان وانگر گڏ ويٺا آهيون، مان گذريل چاليهن سالن کان سياست ۾ آهيان، پهريون دفعو 60 جي ڏهاڪي جي آخر ۾ سعودي عرب ويو هئس، ڪيترائي دورا ڪيا، پر تازو رياض جو دورو بلڪل منفرد هو.”
شهباز شريف چيو ته سعودي ڀائرن ۽ ڀينرن هميشه پاڪستان سان بي مثال محبت جو اظهار ڪيو آهي، ۽ هر ڏکي وقت ۾ پاڪستان جو ساٿ ڏنو آهي. هن چيو ته سعودي عرب جا لاڳاپا پاڪستان سان غير متزلزل ۽ مستقل عزم تي ٻڌل آهن، جيڪي ٻنهي ملڪن جي تاريخ ۾ نمايان رهيا آهن.
وزيراعظم وضاحت ڪئي ته پاڪ-سعودي دفاعي معاهدو ڀائيچاري تي ٻڌل لاڳاپن جي باقاعده شڪل آهي، ۽ مقدس ماڳن جي تحفظ لاءِ هر مسلمان پنهنجي جان قربان ڪرڻ لاءِ تيار آهي. مڪي ۽ مديني جا مقدس ماڳ هميشه لاءِ اسان جي حفاظت هيٺ رهندا.
شهباز شريف چيو ته هاڻ وقت اچي ويو آهي ته پاڪ-سعودي لاڳاپن کي واپار، سيڙپڪاري، تحقيق ۽ ترقي جي شعبن ۾ عملي تعاون ذريعي نئين سطح تي آندو وڃي. هن زور ڏنو ته پاڪستان ۽ سعودي عرب کي گڏجي پنهنجا ڪاروباري خواب حقيقت بڻائڻا پوندا.
وزيراعظم ولي عهد شهزادو محمد بن سلمان جي متحرڪ ۽ وژنري قيادت جي واکاڻ ڪندي چيو ته هن سعودي معاشري کي نئين رخ ڏنو آهي، ۽ پاڪستان لاءِ سعودي عرب کان سکڻ جو بهترين موقعو موجود آهي.
ٻئي طرف، سعودي وفد جي سربراهه شهزادو منصور بن محمد السعود چيو ته هو پاڪستان-سعودي عرب گڏيل بزنس ڪائونسل جي اجلاس لاءِ آيا آهن. دوري کان اڳ سعودي عرب جي سڀني وزيرن سان ملاقاتون ڪري، پاڪستان ۾ ممڪن اسٽريٽجڪ منصوبن بابت آگاهي ڏني وئي. هن چيو ته سعودي ڪاروباري طبقن کي پاڪستان ۾ سيڙپڪاري لاءِ سهولتون فراهم ڪيون وينديون.
