شرم الشيخ: اسرائيل ۽ فلسطيني مزاحمتي تنظيم حماس آمريڪا جي ثالثي هيٺ طئي ٿيل غزه امن معاهدي جي پهرين مرحلي جي باضابطه منظوري ڏئي ڇڏي آهي، جنهن جو مقصد جنگ جو خاتمو ۽ انساني بحران جو حل ڳولڻ آهي.
آمريڪي صدر ڊونلڊ ٽرمپ سوشل ميڊيا تي پنهنجي پيغام ۾ هن اهم پيش رفت جو اعلان ڪندي چيو ته معاهدي تحت سڀني يرغمالين جي جلد آزادي ممڪن بڻائي ويندي، جڏهن ته اسرائيلي فوج متفقه حدن جي مطابق غزه مان مرحليوار واپسي شروع ڪندي.
صدر ٽرمپ هن قدم کي امن جي ڊگهي سفر جي پهرين وڏي ڪاميابي قرار ڏيندي چيو ته هن عمل ۾ شامل سڀني ڌرين سان انصاف تي ٻڌل ورتاءُ ڪيو ويندو. هن قطر، مصر ۽ ترڪي جي ثالثي واري ڪردار تي خاص طور شڪريو ادا ڪيو.
صدر ٽرمپ وڌيڪ چيو ته هي ڏينهن نه صرف عرب ۽ مسلم دنيا، پر اسرائيل، خطي جي سڀني پاڙيسري ملڪن ۽ آمريڪا لاءِ به هڪ تاريخي ڏينهن آهي.
ذريعن موجب، غزه ۾ جنگ بندي جو باقاعده اعلان اڄ متوقع آهي، جنهن جي تفصيلون ايندڙ ڪجهه ڏينهن ۾ سامهون آڻڻ جو امڪان آهي.
ٻئي طرف، قطري وزارتِ خارجہ به تصديق ڪئي آهي ته معاهدي جي پهرين مرحلي تي اتفاق ٿي چڪو آهي، جنهن ۾ جنگ بندي، يرغمالين ۽ قيدين جي آزادي، ۽ انساني امداد جي بحالي شامل آهي.
هن پيش رفت کانپوءِ اسرائيلي وزيراعظم بنيامين نيتن ياهو مختصر بيان ۾ چيو ته “اسان پنهنجي سڀني شهرين کي محفوظ واپس آڻڻ لاءِ پرعزم آهيون، ۽ هي معاهدو اسان جي يرغمالين جي واپسي ڏانهن پهريون قدم آهي.”
