اسلام آباد (ويب ڊيسڪ) نائب وزيراعظم ۽ پرڏيهي وزير اسحاق ڊار قومي اسيمبلي ۾ خطاب ڪندي چيو آهي ته غزه جي امن لاءِ آمريڪي صدر ڊونلڊ ٽرمپ پاران پيش ڪيل 20 نڪاتي منصوبو پاڪستان جي موقف سان مطابقت نٿو رکي. هن واضح ڪيو ته اهو ڊرافٽ تبديل ٿيل آهي ۽ پاڪستان قائداعظم جي فلسطين بابت پاليسي تي قائم آهي.
اسحاق ڊار چيو ته وزيراعظم شهباز شريف اقوام متحده جي جنرل اسيمبلي ۾ ملڪ جي ڀرپور نمائندگي ڪئي، جتي هن ڪشمير ۽ فلسطين جا مسئلا اجاگر ڪيا، موسمي تبديلي تي ڳالهايو ۽ اسرائيل جي مظالم جي مذمت ڪئي.
هن چيو ته اقوام متحده، يورپي يونين ۽ عرب ملڪن غزه ۾ رت وهڻ روڪڻ ۾ ناڪام رهيا آهن. پاڪستان جي ڪوشش آهي ته ڪجهه اسلامي ملڪن سان گڏجي آمريڪا کي شامل ڪري، جتي روزانو معصوم جانون وڃائجي رهيون آهن، بک، بيدخلي ۽ مغربي ڪناري تي قبضي جا منصوبا هلي رهيا آهن.
اسحاق ڊار ٻڌايو ته 64 هزار ماڻهو شهيد ٿي چڪا آهن ۽ هڪ لک پنجاهه هزار کان وڌيڪ زخمي آهن. اقوام متحده ۽ او آءِ سي پاران ڪيترين ئي قراردادن جي منظوري باوجود صورتحال بهتر نه ٿي سگهي آهي.
هن چيو ته پاڪستان، ترڪي، انڊونيشيا ۽ پنج عرب ملڪن جي صدورن ۽ وزيراعظمن پنهنجي پرڏيهي وزيرن سان گڏ آمريڪي صدر سان ملاقات ڪئي. جڏهن 20 نڪاتي ايجنڊو ڏنو ويو ته اسلامي ملڪن طرفان ترميم ٿيل منصوبو پيش ڪيو ويو، پر فائنل ٿيل ڊرافٽ ۾ جيڪي تبديليون آنديون ويون، اهي قابل قبول نه آهن.
اسحاق ڊار چيو ته اهو ڊرافٽ نه آهي جيڪو پاڪستان ۽ ٻين مسلمان ملڪن تيار ڪيو هو. اسان ان تي ئي ڌيان ڏينداسين، جنهن تي 8 اسلامي ملڪن اتفاق ڪيو هو.
هن زور ڏنو ته غزه ۾ مڪمل جنگ بندي ضروري آهي ۽ تعمير نو ڪئي وڃي. فلسطين جو مسئلو سياسي نه، اسلامي ملڪن جي ذميواري آهي. پاڪستان جي فلسطين بابت پاليسي قائداعظم جي پاليسي آهي.
نائب وزيراعظم ٻڌايو ته صمود فلوٽيلا ۾ پاڪستان جو هڪ شهري به شامل هو، اسرائيل 22 پاڪستانين کي تحويل ۾ ورتو آهي، جن ۾ اڳوڻو سفير مشتاق احمد به شامل آهي. پاڪستان انهن جي آزادي لاءِ هڪ بااثر يورپي ملڪ سان رابطي ۾ آهي.
سعودي عرب سان معاهدي بابت اسحاق ڊار چيو ته حرمين شريفين لاءِ جان به قربان آهي. معاهدي تي ڳالهه ٻولهه پي ڊي ايم دور ۾ شروع ٿي، موجوده حڪومت ان تي ڪم مڪمل ڪيو. هن چيو ته اهو انتهائي اهم معاهدو آهي، جنهن کان پوءِ ٻين ملڪن به دلچسپي ڏيکاري. جيڪڏهن وڌيڪ ملڪ شامل ٿيا ته اهو هڪ نيٽورڪ بڻجي سگهي ٿو، ۽ پاڪستان مسلم امه جي اڳواڻي ڪندو.
