اسلام آباد: (ويب ڊيسڪ) نائب وزيراعظم اسحاق ڊار چيو آهي ته افغانستان کي واضح طور ٻڌايو ويو آهي ته هو پنهنجي سرزمين کي پاڪستان خلاف استعمال نه ٿيڻ ڏي ۽ ٽي ٽي پي کي يا ته پاڪستان حوالي ڪري يا ڪيڏانهن پري منتقل ڪري.
اسلام آباد ۾ پريس ڪانفرنس دوران اسحاق ڊار ٻڌايو ته هن ڪابل جي دوري ۾ افغان قيادت سان کليل ڳالهه ٻولهه ڪئي ۽ سڀني معاملن تي پنهنجو موقف رکيو. هن چيو ته افغانستان ۾ ٿيندڙ فيصلا ۽ واعدا ڪابل ۾ ئي دنيا جي سامهون رکيا ويا. نائب وزيراعظم ٻڌايو ته روسي دوري دوران پرڏيهي وزارت اڳواٽ خط موڪليو هو، جنهن جي نتيجي ۾ روسي پرڏيهي وزير سرگئي ۽ نائب وزيراعظم اليڪسي اوورچڪ سان الڳ الڳ ملاقاتون ٿيون، جن ۾ مختلف روسي وزير پڻ موجود هئا.
هن وڌيڪ چيو ته ڪيترن ئي سالن بعد يورپي يونين جي صدر سان ڪنهن پاڪستاني اڳواڻ جي ملاقات ٿي آهي. 2021 کان پوءِ پنجن سالن تائين پاڪستان-اي يو ڳالهين ۾ وقفو رهيو، پر هاڻي اهم اسٽريٽجڪ ڊائلاگ سان اها کوٽ پوري ٿي آهي.
اسحاق ڊار جو چوڻ هو ته اي يو سان واپار، معيشت، جي ايس پي پلس، افغانستان، سيڪيورٽي ۽ ڀارت سميت سڀني معاملن تي کليل ڳالهه ٻولهه ڪئي وئي. هن زور ڏنو ته افغانستان کان پاڪستان تي ٿيندڙ حملن بابت تفصيلي بحث ڪيو ويو.
