اسلام آباد(ويب ڊيسڪ) نائب وزيراعظم ۽ پرڏيهي وزير اسحاق ڊار چيو آهي ته دنيا ۾ جاري تڪرار عالمي امن لاءِ سنگين خطرو بڻيل آهن، جڏهن ته مئي ۾ ٿيل پاڪ-ڀارت جنگ به انتهائي خطرناڪ ثابت ٿي سگهي ها.
اسلام آباد ۾ هڪ تقريب کي خطاب ڪندي اسحاق ڊار عالمي سطح تي هلندڙ تڪرارن کي امن لاءِ وڏو چيلنج قرار ڏنو. هن چيو ته موسمياتي تبديلي به هڪ وڏو خطرو آهي، جنهن سبب گرمي پد ۾ اضافو ۽ لڳاتار ايندڙ ٻوڏون معيشت تي تباهه ڪن اثر ڇڏين ٿيون.
نائب وزيراعظم عالمي معاشي منظرنامي ۾ ايندڙ تبديليءَ تي به روشني وڌي ۽ اسرائيل طرفان غزه ۾ فلسطيني عوام جي قتل عام جي سخت مذمت ڪئي.
هن وڌيڪ چيو ته پاڪستان هميشه تڪرارن جي حل لاءِ ڳالهين ۽ سفارتڪاريءَ جي حمايت ڪندو رهيو آهي. پنهنجي خطاب ۾ هن ڏکڻ ايشيا ۾ غربت، جھالت ۽ اوچتين آفتن کي به اهم چيلنج طور اجاگر ڪيو.
