واشنگٽن: آمريڪا اقوام متحده جي سلامتي ڪائونسل کان درخواست ڪئي آهي ته غزه ۾ هڪ بين الاقوامي سيڪيورٽي فورس (آئي ايس ايف) قائم ڪرڻ جي منظوري ڏني وڃي، جيڪا گهٽ ۾ گهٽ ٻن سالن لاءِ تعينات رهندي.
آمريڪي ويب سائيٽ جي رپورٽ موجب، آمريڪا سلامتي ڪائونسل جي ميمبر ملڪن کي هڪ مسودو قرارداد موڪلي آهي، جنهن ۾ فورس جي اختيارن، ذميوارين ۽ قيام جي تفصيل شامل آهي.
رپورٽ ۾ ٻڌايو ويو آهي ته اها فورس “غزه بورڊ آف پيِس” جي مشوري سان جوڙي ويندي، جنهن جي صدارت آمريڪي صدر ڊونلڊ ٽرمپ ڪندا. مسودي موجب، آئي ايس ايف کي غزه جي سرحدي سيڪيورٽي، عام شهرين ۽ امدادي رستن جي تحفظ، فلسطيني پوليس جي تربيت ۽ علائقي کي غير عسڪري بڻائڻ جي ذميواري ڏني ويندي.
فورس کي اهو اختيار حاصل هوندو ته هو پنهنجي مينڊيٽ جي مڪمل ڪرڻ لاءِ بين الاقوامي قانونن جي مطابق ضروري قدم کڻي سگهي. رپورٽ ۾ واضح ڪيو ويو آهي ته آئي ايس ايف هڪ نفاذي فورس هوندي، امن مشن نه، جنهن جو مقصد غزه ۾ عبوري سيڪيورٽي مهيا ڪرڻ آهي ته جيئن اسرائيل آهستي آهستي علائقي مان نڪري سگهي ۽ فلسطيني اٿارٽي اصلاحات کان پوءِ انتظام سنڀالي سگهي.
قرارداد ۾ اها تجويز به ڏني وئي آهي ته غزه جي سول انتظاميه هڪ غير سياسي ٽيڪنوڪريٽ ڪميٽي ذريعي هلائي ويندي، جڏهن ته انساني امداد گڏيل قومن، ريڊ ڪراس ۽ ريڊ ڪريسنٽ ذريعي فراهم ڪئي ويندي.
