اسلام آباد (ويب ڊيسڪ) وزيراعظم شهباز شريف ملڪ ۾ وڌندڙ دهشتگردي خلاف فيصلائتي ڪارروائي جو اشارو ڏيندي چيو آهي ته هاڻ وڌيڪ انتظار نه ڪيو ويندو، جيڪڏهن قدم نه کنيا ويا ته سڄي محنت ضايع ٿي سگهي ٿي.
وفاقي ڪابينا جي اجلاس دوران خطاب ڪندي وزيراعظم چيو ته گذريل ٻن هفتن دوران اهم واقعا پيش آيا، جتي راولپنڊي ۾ فيلڊ مارشل عاصم منير ۽ اعليٰ آفيسرن سان گڏ شهيد ٿيل ليفٽننٽ ڪرنل جنيد، ميجر طيب ۽ 9 جوانن جي جنازي ۾ شرڪت ڪئي. هن ٻڌايو ته جنيد بهادريءَ جي تاريخ رقم ڪئي ۽ فتنہ خوارج جي 19 دهشتگردن کي مارڻ بعد پاڻ شهيد ٿيو.
وزيراعظم چيو ته روزانو قيمتي جانيون قربان ٿي رهيون آهن، شهيدن جا ٻار يتيم ٿي رهيا آهن ته جيئن لکين ٻارن جا والدين بچي سگهن. هن افسوس جو اظهار ڪندي چيو ته ڪجهه عناصر دهشتگردن کي تحفظ ڏين ٿا، جڏهن ته همسايه ملڪ مان خوارج اچي حملو ڪن ٿا، ۽ دوست نما دشمن انهن جي واکاڻ ڪن ٿا.
شهباز شريف چيو ته شهيدن پنهنجي رت سان وطن جي حفاظت جي لڪير ڇڪي ڇڏي آهي، هاڻ ان لڪير کي ڪو به پامال نه ٿو ڪري سگهي. هن اعلان ڪيو ته دهشتگردي جي مڪمل خاتمي لاءِ هاڻ قوم، حڪومت، ادارا ۽ عوام متحد آهن.
وزيراعظم چيو ته ڪراچي کان پشاور تائين عوام پريشان آهي، جڏهن ته سفارتي ۽ معاشي ميدان ۾ ڪاميابيون حاصل ٿي رهيون آهن. هن زور ڏنو ته هاڻ “آگ ۽ پاڻي” جو راند نه هلندي، ۽ دهشتگردي جي خاتمي لاءِ سخت فيصلا ڪرڻا پوندا.
فلسطين بابت ڳالهائيندي وزيراعظم چيو ته پاڪستان هميشه غزه جي حق ۾ آواز بلند ڪيو آهي، اقوام متحده ۾ 24 ڪروڙ عوام ۽ سياسي جماعتن جي گڏيل موقف کي اجاگر ڪيو ويو. هن ٻڌايو ته صدر ٽرمپ سان ملاقات دوران جنگ بندي تي ڳالهه ٻولهه ٿي، جتي پاڪستان جو موقف واضح ڪيو ويو.
وزيراعظم چيو ته چين، سعودي عرب ۽ ملائيشيا سان لاڳاپا مضبوط آهن، ۽ پاڪستان عالمي سطح تي پنهنجو ڪردار ادا ڪري رهيو آهي. هن ملائيشيا جي دوري دوران 200 ملين ڊالر جي هلال گوشت جي معاهدي جو ذڪر ڪيو، ۽ بلوم برگ جي رپورٽ موجب پاڪستان کي ٻي ابھرتي معيشيت قرار ڏنو ويو، جيڪو شبانه روز محنت جو نتيجو آهي.
شهباز شريف آخر ۾ چيو ته شهيدن جي قربانين کي وسارڻ بدترين خيانت هوندي، ۽ دهشتگردن جا سهولتڪار به برابر جي ڏوهاري آهن. قوم هاڻ خوارج جي خاتمي لاءِ مڪمل طور تي يڪسو آهي.
