لاهور (ويب ڊيسڪ): وفاقي اطلاعات واري وزير عطا الله تارڙ چيو آهي ته عمران خان ۽ پاڪستان تحريڪ انصاف (پي ٽي آءِ) هر قومي ۽ عالمي فورم تي دهشتگردن جي حمايت ڪندا رهيا آهن. هن چيو ته تحريڪ انتشار (پي ٽي آءِ) اها واحد سياسي جماعت آهي، جنهن کي نه شهيدن جي قربانين جي پرواهه آهي ۽ نه ئي ملڪ جي سلامتي جي.
ميڊيا سان ڳالهائيندي عطا الله تارڙ چيو ته پاڪ فوج جي آفيسرن ۽ جوانن دهشتگردي خلاف بهادري سان مقابلو ڪيو. هن دعويٰ ڪئي ته ڪي ماڻهو خيبر پختونخوا ۾ امن قائم ٿيڻ جي رستي ۾ رڪاوٽ بڻيل آهن، ۽ تحريڪ انتشار جو اصل مقصد صوبو ورهائڻ، حالتون خراب ڪرڻ ۽ دهشتگردن کي محفوظ پناهه گاهون مهيا ڪرڻ آهي.
وفاقي وزير چيو ته عمران خان ۽ سندس جماعت عالمي سطح تي دهشتگردن جا سهولتڪار رهيا آهن. هن چيو ته پي ٽي آءِ جي باني ۽ جماعت هر فورم تي دهشتگردن جي حمايت ڪئي آهي.
عطا الله تارڙ قومي قربانين کي ساراهيندي چيو ته پاڪستاني قوم واحد قوم آهي، جنهن جا ٻار به دهشتگردي خلاف جنگ ۾ قربانيون ڏنيون. هن چيو ته آرمي پبلڪ اسڪول جي شاگردن پنهنجي رت سان قربانين جي تاريخ لکي، جڏهن ته خضدار ۾ شهيد ٿيل ٻارن جي قربانين کي وساري نٿو سگهجي.
هن ٻڌايو ته خيبر پختونخوا جي بهادر عوام، پاڪ فوج، سولين، دڪاندار، ڊاڪٽر، انجنيئر، ٻار ۽ سماج جا سڀ طبقاهه دهشتگردي خلاف جدوجهد ۾ روشن باب آهن. هن اعلان ڪيو ته نيشل ايڪشن پلان تحت دهشتگردن کي شڪست ڏني ويندي ۽ سڄي قوم ان مقصد لاءِ متحد آهي.
وفاقي وزير چيو ته ماضي ۾ روزانو دهشتگردي جا واقعا ٿيندا هئا، جن ۾ پريڊ لائن مسجد ڌماڪو به شامل آهي. هن چيو ته فتنہ خوارج جو نه دين سان واسطو آهي نه اسلام سان، ۽ مسجدن ۽ معصوم ماڻهن تي حملو ڪنهن به صورت ۾ جائز ناهي.
عطا الله تارڙ چيو ته آپريشن رد الفساد ۽ ضرب عضب جي نتيجي ۾ دهشتگردي جو خاتمو ٿيو، بازارن جون رونقون واپس آيون ۽ راندين جا ميدان آباد ٿيا.
آخر ۾ هن چيو ته جيل ۾ ويٺل شخص جي خواهش آهي ته لاشن تي سياست ڪيئن چمڪائجي، جڏهن ته پيپلز پارٽي هميشه “پاڪستان کپي” جو نعرو لڳايو.
