اسلام آباد (ويب ڊيسڪ) سپريم ڪورٽ ۾ 26هين آئيني ترميم خلاف داخل درخواستن جي ٻڌڻي دوران ججن پاران فل ڪورٽ ۽ آئيني بينچ جي تشڪيل بابت سخت سوال اٿاريا ويا. ٻڌڻي 8 رڪني آئيني بينچ جي سربراهي جسٽس امين الدين خان ڪئي، جنهن ۾ جسٽس جمال مندوخيل، جسٽس محمد علي مظهر، جسٽس عائشہ ملڪ، جسٽس حسن اظهر رضوي، جسٽس مسرت هلالي، جسٽس نعيم افغان ۽ جسٽس شاهد بلال شامل هئا.
وڪيل عابد زبيري، جيڪي مختلف بار ايسوسيئيشنز جي طرفان پيش ٿيا، دليل ڏنو ته 26هين ترميم کان اڳ مقرر ٿيل ججن تي مشتمل فل ڪورٽ کي هن آئيني نوعيت جي ڪيس جي ٻڌڻي ڪرڻ گهرجي. هن چيو ته بينچ جي تشڪيل ڪنهن فریق جو حق نه آهي، پر فل ڪورٽ جي ٻڌڻي سان آئيني وضاحت وڌيڪ مضبوط ٿيندي.
جسٽس جمال مندوخيل سوال ڪيو ته ڇا ڪنهن فریق کي خاص بينچ جي گهر جي اجازت آهي؟ ۽ جيڪڏهن اها استدعا مڃجي ته ڇا ججن جي چونڊ به مرضي سان ٿيندي؟ جسٽس محمد علي مظهر وضاحت ڪئي ته آرٽيڪل 191-A تحت آئيني معاملا صرف آئيني بينچ ئي ٻڌي سگهي ٿو، ۽ فل ڪورٽ جي تشڪيل جو اختيار آئيني طور واضح ناهي.
جسٽس عائشہ ملڪ وڪيل کان پڇيو ته سندن درخواست ڇا آهي، جنهن تي عابد زبيري چيو ته فل ڪورٽ، جيڪو ترميم کان اڳ مقرر ٿيل ججن تي مشتمل هجي، ڪيس جي ٻڌڻي ڪري. جسٽس مندوخيل راءِ ڏني ته جيڪڏهن موجوده ججن کي هٽايو وڃي ته پوءِ ڪيس ٻڌي ڪير؟
جسٽس نعيم افغان چيو ته وڪيل جا دليل ترميم کان اڳ جي قانونن تي ٻڌل آهن، جڏهن ته هاڻي آئيني طور بينچز جي ورڇ واضح آهي، ۽ چیف جسٽس به آئيني بينچ ۾ ججن شامل نٿو ڪري سگهي.
جسٽس مندوخيل وڌيڪ چيو ته جيڪڏهن 26هين ترميم نه هجي ها ته يحيي آفريدي چیف جسٽس بڻجي ها، ۽ جيڪڏهن موجوده ججن ترميم جا فائدو وٺندڙ آهن ته ڇا اهي ڪيس ٻڌي سگهن ٿا؟ وڪيل وضاحت ڪئي ته هو ڪنهن جج تي تعصب جو الزام نه ٿا لڳائن، صرف آئيني طريقيڪار جي پيروي چاهين ٿا.
عدالت ۾ فل ڪورٽ جي تشڪيل، آئيني بينچ جي دائري، چیف جسٽس جي اختيارن ۽ آرٽيڪل 191-A جي تشريح تي تفصيلي بحث جاري رهيو. جسٽس مظهر واضح ڪيو ته فل ڪورٽ جو لفظ آئيني متن ۾ موجود ناهي، ۽ هاڻي چیف جسٽس کي بينچ ٺاهڻ جو اختيار نه رهيو آهي.
سپريم ڪورٽ ڪيس جي ٻڌڻي سڀاڻي تائين ملتوي ڪري ڇڏي.
