اسلام آباد (بيورو رپورٽ) وزيراعظم محمد شهباز شريف جي صدارت هيٺ افغان مهاجرن جي واپسي بابت اعليٰ سطحي اجلاس اسلام آباد ۾ جاري آهي، جنهن ۾ سڀني صوبن جي وزراءِ اعليٰ ۽ وزيراعظم آزاد ڪشمير شرڪت ڪئي آهي، سواءِ خيبرپختونخوا جي وزيراعليٰ سهيل آفريدي جي، جن قومي سطح جي هن اهم اجلاس ۾ شرڪت کان معذرت ڪئي.
اجلاس ۾ پنجاب، سنڌ، بلوچستان جي وزراءِ اعليٰ، گلگت بلتستان جي وزيراعليٰ ۽ وفاقي ڪابينا جا ميمبر پڻ شامل آهن. عسڪري اختيارين جي موجودگي ۾ ٿيندڙ هن اجلاس جو ايجنڊو صرف هڪ نڪتي تي مشتمل آهي: افغان مهاجرن جي واپسي جي عمل تي غور. اجلاس دوران افغان مهاجرن بابت اهم فيصلا ٿيڻ جا امڪان آهن.
دلچسپ ڳالهه اها آهي ته خيبرپختونخوا جو وزيراعليٰ اسلام آباد ۾ موجود هجڻ باوجود اجلاس ۾ شرڪت نه ڪئي، جنهن تي سياسي حلقن ۾ سوال اٿيا آهن.
ٻئي طرف، وزيراعظم شهباز شريف ملڪ ۾ آيل تباه ڪندڙ ٻوڏ بابت به هڪ الڳ اجلاس طلب ڪيو آهي، جنهن ۾ چارئي صوبن جا وزراءِ اعليٰ، وزيراعظم آزاد ڪشمير ۽ گلگت بلتستان جي وزيراعليٰ کي دعوت ڏني وئي آهي.
ذريعن موجب، اجلاس ۾ ٻوڏ سبب ٿيل نقصانن جو جائزو ورتو ويندو، متاثرن جي بحالي جي اڳڀرائي تي به غور ڪيو ويندو، جڏهن ته گندم پاليسي تي به تفصيلي ڳالهه ٻولهه جو امڪان آهي.
