اسلام آباد(ويب ڊيسڪ) وزيراعظم ميان شهباز شريف ملڪ جي صنعت ۽ زراعت جي واڌاري لاءِ “روشن معيشت بجلي پيڪيج” جو اعلان ڪندي چيو آهي ته ايندڙ ٽن سالن دوران (نومبر 2025 کان آڪٽوبر 2028 تائين) صنعتن ۽ آبادگارن کي رعايتي اگهه تي اضافي بجلي فراهم ڪئي ويندي.
وزيراعظم هي اعلان صنعتي ۽ زرعي شعبي جي ماهرن ۽ واپاري برادري جي وفد سان ملاقات دوران ڪيو. هن ٻڌايو ته صنعتي شعبي کي 34 رپيا ۽ زرعي شعبي کي 38 رپيا في يونٽ تي ملندڙ بجلي جي اگهه ۾ نمايان گهٽتائي آندي ويندي، ۽ هاڻ اضافي بجلي 22 رپيا 98 پيسا في يونٽ تي فراهم ڪئي ويندي.
شهباز شريف واضح ڪيو ته هن پيڪيج تحت فراهم ٿيندڙ بجلي جو بار نه ته گهريلو صارفين تي پوندو ۽ نه ئي ڪنهن ٻئي شعبي تي. هن بجلي جي وزير سردار اويس لغاري ۽ سندس ٽيم جي ڪوششن کي ساراهيندي چيو ته انهن جي محنت قابل تحسين آهي.
وزيراعظم چيو ته ملڪ جي معيشت جي مضبوطي ۽ روزگار جي واڌاري لاءِ صنعت ۽ زراعت جي ترقي انتهائي ضروري آهي. هن زور ڀريو ته ملڪ جي صنعتن ۽ زرعي شعبي کي علائقائي سطح تي مقابلي جي سگهه ڏيڻ ۽ ڪاروباري سهولتن ۾ واڌ لاءِ حڪومت هر ممڪن قدم کڻي رهي آهي.
گذريل سال سياري جي موسم ۾ ڏنل بجلي پيڪيج تحت صنعتن ۽ آبادگارن 410 گيگا واٽ اضافي بجلي استعمال ڪئي، جنهن سان نه صرف صنعتن جو ڦيٿو گهميو، پر برآمدات ۾ واڌ ۽ روزگار جا نوان موقعا پيدا ٿيا.
شهباز شريف چيو ته معاشي بحران مان نڪرڻ جو سفر ڏکيو ضرور هو، پر معاشي ٽيم جي محنت ۽ عوام جي سهڪار سان اهو ممڪن ٿيو. هن اميد ظاهر ڪئي ته صنعت ۽ زراعت جي شعبي جي ترقي سان ملڪ قرضن مان ڇوٽڪارو حاصل ڪندو، ۽ الله جي فضل سان بهتر پاليسين جي نتيجي ۾ معاشي اشاري به بهتر ٿيا آهن.
آخر ۾ وزيراعظم چيو ته اڃا به گڏجي وڌيڪ محنت ڪرڻي پوندي، ۽ پختو يقين آهي ته عوام جي سهڪار ۽ معاشي ٽيم جي رات ڏينهن جي محنت سان پاڪستان جلد معاشي خودمختياري حاصل ڪري وٺندو.
