ممبئي (شوبز نيوز) بالي ووڊ جي مشهور گلوڪاره ۽ اداڪاره سلڪشنا پنڊت 71 ورهين جي عمر ۾ دل جي دوري سبب ناناوتي اسپتال ۾ ديھانت ڪري وئي. موسيقار للت پنڊت، جيڪي سلڪشنا جا ڀاءُ آهن، تصديق ڪئي ته هوءَ شام 8 وڳي اسپتال ۾ دم ڌڻي حوالي ڪري وئي.
سلڪشنا پنڊت موسيقي جي ناليواري ميواٽي گھراني سان تعلق رکندڙ هئي، ۽ مشهور کلاسڪي گلوڪار پنڊت جسراج جي ڀتجي هئي. هن جا ڀاءُ جتن ۽ للت پنڊت فلمي دنيا جي مشهور موسيقار جوڙي طور سڃاتا وڃن ٿا.
1970 ۽ 1980 جي ڏهاڪن ۾ سلڪشنا محمد رفيع، ڪشور ڪمار ۽ مکيش جهڙن ليجنڊز سان گڏ ڪيترائي يادگار گيت ڳايا، جيڪي اڄ به فلمي موسيقي جا کلاسڪ سمجهيا وڃن ٿا.
اداڪاري جي ميدان ۾ به سلڪشنا پنڊت “الجھن”، “خاندان”، “اپناپن” ۽ “وقت جي ديوار” جهڙين مشهور فلمن ۾ پنهنجي فن جو مظاهرو ڪيو.
ذاتي زندگي ۾ سلڪشنا کي گهڻا ڏک برداشت ڪرڻا پيا. سنجيو ڪمار سان يڪطرفه محبت، تنها زندگي، صحت جا مسئلا ۽ مالي مشڪلاتون هن جي زندگي جا ڏکيا باب رهيا.
سلڪشنا جي آخري رسمن جو اعلان 7 نومبر جي منجهند لاءِ ڪيو ويو آهي، جتي فلمي صنعت جا ڪيترائي فنڪار سندس الوداعي لمحن ۾ شرڪت ڪندا.
