اسلام آباد (ويب ڊيسڪ) پارليامينٽ ۾ پيش ڪيل 27هين آئيني ترميمي بل هن هفتي کي سپريم ڪورٽ جي مستقبل لاءِ فيصلائڪ بڻائي ڇڏيو آهي. مجوزه ترميم تحت سپريم ڪورٽ کي وفاقي آئيني عدالت جي ماتحت آڻڻ جي تجويز ڏني وئي آهي، جنهن جو پهريون چيف جسٽس انتظاميه مقرر ڪندي.
ترميمي بل موجب، سپريم ڪورٽ نئين وفاقي آئيني عدالت جي دائري اختيار جي پابند هوندي، ۽ ان سان گڏ سپريم ڪورٽ ۽ چيف جسٽس آف پاڪستان جي نالي مان “پاڪستان” جو لفظ ختم ڪيو ويندو.
ذريعن مطابق، حڪومت هن هفتي ترميمي بل منظور ڪرائڻ لاءِ پرعزم آهي. چيف جسٽس يحييٰ آفريدي جي غير موجودگي دوران جسٽس منظور علي شاهه قائم مقام چيف جسٽس جو حلف وٺندو. جيڪڏهن ترميم منظور ٿي وئي ته حڪومت ڪنهن به جج کي قائم مقام چيف جسٽس مقرر ڪري سگهي ٿي.
وڪيل برادري جي نظر ۾ هي ترميم عدليه جي خودمختاري لاءِ سنگين خطرو آهي. قانوني ماهرن جو چوڻ آهي ته سپريم ڪورٽ جي ججن کي اصولي طور استعيفيٰ ڏيڻ گهرجي، ته جيئن عدليه جي آزادي جو تحفظ ٿي سگهي.
سابق ايڊشنل اٽارني جنرل طارق محمود کوسا چيو ته اهڙي عدالت جي ساکھ مشڪوڪ هوندي، جنهن جو سربراهه حڪومت مقرر ڪري. وڪيلن جو مطالبو آهي ته چيف جسٽس آفريدي ترميم جي منظوري کان اڳ فل ڪورٽ اجلاس طلب ڪري.
نئين وفاقي آئيني عدالت لاءِ حڪومتي اثر کان آزاد هجڻ جو تاثر قائم رکڻ وڏو چئلينج هوندو، خاص طور تي موجوده پارليامينٽ جي ساکھ جي پسمنظر ۾. ترميمي بل تي عدليه جو ردعمل ايندڙ ڏينهن ۾ واضح ٿيڻ جي اميد آهي.
