اسلام آباد (ويب ڊيسڪ) 27هين آئيني ترميم بابت حڪومت ۽ پيپلز پارٽي وچ ۾ جاري ڊيڊ لاڪ ختم ٿي ويو آهي، جنهن کان پوءِ مجوزه بل جي مسودي کي آخري شڪل ڏئي ڇڏي وئي آهي.
ذريعن موجب، مسلم ليگ ن ۽ پيپلز پارٽي جي وچ ۾ ٿيل اجلاس ۾ اهم نڪتن تي اتفاق راءِ پيدا ٿيو، جنهن جي تصديق وفاقي وزير قانون اعظم نذير تارڙ ڪئي. هن ٻڌايو ته ڪجهه تبديليون تجويز ڪيل هيون، جيڪي مڪمل ڪري مسودو پرنٽنگ لاءِ موڪليو ويو آهي.
ان کان اڳ سينيٽر اعظم نذير تارڙ جي چيمبر ۾ ٿيل اجلاس ۾ ججن جي بدلي، ڪيسن جي منتقلي ۽ آرٽيڪل 243 تي تفصيلي مشاورت ڪئي وئي. اجلاس ۾ نائب وزيراعظم اسحاق ڊار، شيري رحمان، نويد قمر ۽ سينيٽر انوشه رحمان پڻ شريڪ هئا، جيڪي ايون بالا ۾ نمبر گيم مڪمل ڪرڻ لاءِ سرگرم رهيون.
ذريعن جو چوڻ آهي ته ٻن اهم نڪتن تي اختلاف موجود هو، جيڪي هاڻي ختم ٿي چڪا آهن، ۽ ٻنهي جماعتن جي اتفاق راءِ سان ترميمي مسودي کي حتمي صورت ڏني وئي آهي. ترميم جي منظوري لاءِ ايندڙ ڏينهن اهم قرار ڏنا پيا وڃن.
