پشاور(ويب ڊيسڪ) خيبرپختونخوا جي وڏي وزير سهيل آفريدي چيو آهي ته صوبو اڳ ئي باني پي ٽي آءِ جي قيادت هيٺ هلي رهيو آهي، تنهن ڪري هتي ڪنهن ٻئي راج جي ضرورت ناهي۔ “جيڪڏهن همت آهي ته گورنر راج لڳائي ڏيکاريو، اسان ڪنهن کان نٿا ڊڄون”، هن سخت لهجي ۾ چيو۔
حيات آباد ۾ ميڊيا سان ڳالهائيندي سهيل آفريدي چيو ته پي ٽي آءِ چيئرمين عمران خان جو احساس ۽ وژن ئي اسان جو رستو ۽ اوليت آهي، جنهن تحت مستحقن لاءِ زڪوات فنڊ جي رقم فوري ورهائڻ ۽ ضم ٿيل ضلعن ۾ معذور ماڻهن کي سهائتا اوزار مهيا ڪرڻ جا حڪم ڏنا ويا آهن۔
وڏي وزير جو چوڻ هو ته صوبائي حڪومت اهي سڀئي ڀلائي جا قدم پنهنجي محدود وسيلا استعمال ڪندي کڻي رهي آهي، جڏهن ته وفاق تي 3 هزار ارب رپين کان وڌيڪ واجبات اڃا تائين ادا ٿيڻا آهن۔
“سوچيو ته جيڪڏهن وفاق اسان جا پيسا ڏئي ڇڏي ته اسان ڪيترو ڪم ڪري سگهون ٿا”، هن زور ڏنو۔
هن وفاقي حڪومت تي 5300 ارب رپين جي ڪرپشن جو الزام پڻ لڳايو ۽ افسوس ظاهر ڪيو ته “اسان ڊليور ڪري رهيا آهيون، عوام کي رليف ڏئي رهيا آهيون، پوءِ به اسان تي آڱريون کڄن ٿيون”۔
تقريب دوران وزيراعليٰ ضم ٿيل ضلعن جي اسڪولن لاءِ ٽرانسپورٽ سهولتون فراهم ڪرڻ جو اعلان ڪيو ۽ خاص ٻارن جي اسڪولن ۾ موجود سڀ ناپيد سهولتون فوري طور مهيا ڪرڻ جي هدايت ڪئي۔
احساس اُميد پروگرام جي شروعات
ان کان اڳ سهيل آفريدي صوبي مان شديد معذوري جو شڪار ماڻهن لاءِ “احساس اُميد پروگرام” جي شروعات ڪئي، جنهن تحت 10 هزار معذور ماڻهن کي هر مهيني 5 هزار رپيا ڏنا ويندا، جڏهن ته پروگرام لاءِ جنوري کان جون 2026 تائين 30 ڪروڙ رپيا خرچ ٿيندا۔
وزيراعليٰ سماجي ڀلائي واري کاتي جي ڪنٽرول هيٺ هلندڙ 54 خاص تعليمي ادارن جي شاگردن لاءِ خريد ڪيل 23 نيون گاڏيون به باضابطه طور سوشل ويلفيئر ڊائريڪٽر حوالي ڪيون، جن جي مجموعي قيمت 37.7 ڪروڙ رپيا ٻڌائي وڃي ٿي۔
حيات آباد جي اسپيشل ايجوڪيشن ڪامپليڪس ۾ منعقد تقريب ۾ شرڪت ڪندڙن کي ٻڌايو ويو ته پروگرام ۾ شديد معذور ماڻهن کي ترجيح ڏني ويندي ۽ مالي امداد بائيو ميٽرڪ تصديق کان پوءِ سڌي طرح سندن اڪائونٽن ۾ منتقل ڪئي ويندي۔ مستحقن جي چونڊ زڪوات مينيجمينٽ انفارميشن سسٽم تحت ڪئي ويندي.
