تهران/لورستان (ويب ڊيسڪ) ايران ۾ مهانگائي ۽ وڌندڙ خرچن خلاف جاري احتجاج دوران سڪيورٽي فورسز ۽ مظاهرين ۾ شديد جهڙپن سبب گهٽ ۾ گهٽ 6 ڄڻا فوت ٿي ويا، جن ۾ هڪ سيڪيورٽي اهلڪار به شامل آهي.
غير سرڪاري اداري فارس موجب، صوبه چارمحال و بختياري جي شهر لردگان ۾ ٻه شهري سڪيورٽي فورسز سان جهيڙن دوران فوت ٿي ويا. سرڪاري ميڊيا ٻڌايو ته صوبه لورستان جي شهر کوهدشت ۾ بسيج فورس جو 21 ورهين جو اهلڪار مظاهرو ڪندڙن جي پٿرائو سبب مارجي ويو.
انساني حقن جي تنظيم هينگاؤ دعويٰ ڪئي آهي ته لردگان ۾ فورسز جي فائرنگ سان ڪيترائي ماڻهو مارجي ويا ۽ زخمي ٿيا، جڏهن ته کوهدشت ۾ مرڻ وارو شخص مظاهرو ڪندڙ نوجوان هو. انهن دعوائن جي آزاد ذريعن کان تصديق نه ٿي سگهي آهي.
احتجاج جو شروعات آچر تي تهران ۾ واپارين جي هڙتال سان ٿيو، جيڪو مهانگائي، معاشي جمود ۽ ڪرنسي جي قدر ۾ شديد گهٽتائي خلاف هو. بعد ۾ مظاهرا ٻين وڏن شهرن تائين پکڙجي ويا ۽ گهٽ ۾ گهٽ 10 يونيورسٽين جا شاگرد به احتجاج ۾ شامل ٿي ويا.
ايراني معيشت اولهه جي پابندين سبب سخت دٻاءَ هيٺ آهي، جتي گذريل هڪ سال دوران ايراني ريال ڊالر جي مقابلي ۾ ٽئين حصو کان وڌيڪ قدر وڃائي چڪو آهي. سرڪاري انگن اکرن موجب ڊسمبر ۾ مهانگائي جي شرح 52 سيڪڙو تائين پهچي وئي.
ايراني صدر مسعود پزشکيان مظاهرين جي مطالبن کي جائز قرار ڏيندي حڪومت کي معاشي صورتحال بهتر ڪرڻ تي زور ڏنو، جڏهن ته اختيارين خبردار ڪيو آهي ته امن و امان خراب ڪندڙن خلاف سخت ڪارروائي ڪئي ويندي.
