تهران (ويب ڊيسڪ) ايران جي سپريم ليڊر آيت الله خامنه اي چيو آهي ته ايران ۾ ٿيل حاليه مظاهرن ۽ انهن دوران ٿيندڙ فوتگين ۽ مالي نقصان جو اصل ذميوار آمريڪي صدر ڊونلڊ ٽرمپ آهي. عالمي خبر ايجنسي موجب خامنه اي ٽرمپ کي سڌو سنئون ڏوهاري قرار ڏيندي الزام هنيو ته آمريڪي صدر مظاهرن جي پويان ذاتي طور تي ملوث رهيو.
خامنه اي وڌيڪ چيو ته فوتگين، مالي نقصان ۽ عوام خلاف پروپيگنڊا جو ذميوار آمريڪي صدر پاڻ آهي. هن چيو ته ايران مخالف بغاوت هن ڀيري ان ڪري مختلف هئي جو ان ۾ آمريڪي صدر ذاتي طور تي شامل هو.
ايران جي رهبر اعلى الزام لڳايو ته ٽرمپ سوشل ميڊيا ۽ بيانن ذريعي عوام کي اڪسايو، ملڪ ۾ بدامني پکيڙي ۽ تشدد کي هوا ڏني. هن چيو ته اهي احتجاج عوامي تحريڪ نه پر آمريڪا ۽ ان جي اتحادين جي منصوبا بند سازش هئي، جنهن جو مقصد ايران کي عدم استحڪام ڏانهن ڌڪڻ هو.
خامنه اي موجب دشمن قوتون اقتصادي مشڪلاتن کي بنياد بڻائي نظام خلاف نفرت پيدا ڪرڻ چاهين ٿيون.
انساني حقن جي تنظيمن دعويٰ ڪئي آهي ته ايران ۾ ڊسمبر جي آخر کان شروع ٿيل احتجاجن ۾ 2500 کان وڌيڪ ماڻهو مارجي چڪا آهن. ياد رهي ته ٽرمپ ڪيترن ئي بيانن ۾ مظاهرين جي حمايت ڪئي هئي ۽ خبردار ڪيو هو ته جيڪڏهن گرفتار مظاهرين کي سزاءِ موت ڏني وئي ته آمريڪا فوجي ڪارروائي ڪندو. بعد ۾ ٽرمپ دعويٰ ڪئي ته ايران سزائون روڪي ڇڏيون آهن، تنهن ڪري هو فوجي ڪارروائي نه ڪندو.
