اسلام آباد(ويب ڊيسڪ) پاڪ فضائيه مقامي طور تي تيار ڪيل تيمور ويپن سسٽم جو ڪامياب فلائٽ تجربو ڪيو آهي، جنهن کي قومي دفاعي صنعت جي وڏي ڪاميابي قرار ڏنو پيو وڃي.
آءِ ايس پي آر موجب تيمور ايئر لانچڊ ڪروز ميزائل 600 ڪلوميٽر تائين جي رينج سان زميني ۽ بحري هدفن کي انتهائي درستگي سان نشانو بڻائڻ جي صلاحيت رکي ٿو. هي ميزائل روايتي وارهيڊ کڻڻ جي به اهليت رکي ٿو ۽ جديد ترين نيويگيشن ۽ گائيڊنس سسٽم سان ليس آهي. ان کي گهٽ بلندي تي پرواز لاءِ ڊزائن ڪيو ويو آهي، جنهن سان اهو دشمن جي فضائي ۽ ميزائل دفاعي نظام کان بچي سگهي ٿو.
آءِ ايس پي آر جو چوڻ آهي ته هي ٽيسٽ پاڪستان جي دفاعي صنعت جي ٽيڪنيڪي پختگي، جدت ۽ خود انحصاري جو واضح ثبوت آهي. لانچ جي موقعي تي سينيئر فوجي آفيسر، سائنسدان ۽ انجنيئر موجود هئا، جن هن جديد ويپن سسٽم جي تياري ۾ اهم ڪردار ادا ڪيو.
ايئر چييف مارشل ظهير احمد بابر سدھو سائنسدانن، انجنيئرن ۽ فضائيه جي ٽيم کي مبارڪباد ڏيندي چيو ته هي ڪاميابي ٽيڪنالاجي ۾ پاڻڀرو ۽ خطي جي بدلجندڙ سلامتي واري ماحول ۾ قابلِ اعتماد روايت ڊيٽرنس برقرار رکڻ جي عزم جي عڪاسي ڪري ٿي.
صدر آصف علي زرداري به هن ڪاميابي تي فضائيه ۽ دفاعي شعبي کي ڀيٽا پيش ڪئي. هن چيو ته مقامي سطح تي جديد هٿيارن جي تياري قومي صلاحيت، عزم ۽ اداري جي مهارت جو ثبوت آهي. هن وڌيڪ چيو ته هي ڪاميابي پاڪستان جي دفاع کي وڌيڪ مضبوط ڪندي ۽ خطي ۾ استحڪام لاءِ ملڪ جي ذميوارانه پاليسي کي هٿي ڏيندي.
