راولپنڊي(ويب ڊيسڪ) پي ٽي آءِ چيئرمين بيرسٽر گوهر علي خان چيو آهي ته جيڪڏهن ڳالهه پنج وڏن جي ملاقات تائين وڃي ٿي ته ان کي نه ئي سمجهيو وڃي، ڇو ته نه پنج وڏا ملاقات ڪري سگهن ٿا ۽ نه ئي ان جي ضرورت آهي۔
اڊياله روڊ تي ميڊيا سان ڳالهائيندي بيرسٽر گوهر چيو ته جڏهن ملاقاتون ئي نه ٿيڻ ڏنيون وڃن ته پوءِ ڳالهه ٻولهه ڪيئن ٿيندي؟ هڪ مهيني کان وڌيڪ عرصو گذري ويو آهي ۽ باني پي ٽي آءِ سان ڪنهن جي ملاقات نه ٿي آهي۔ هن چيو ته ملاقاتن کي تڪراري بڻائڻ سان ڳالهه اڳتي نه وڌندي، حالتن کي معمول تي آڻڻ لاءِ وڏي قيمت طلب ڪئي پئي وڃي۔
هن اعلان ڪيو ته 8 فيبروري تي سڄي ملڪ ۾ شٽر ڊائون ۽ ڦيٿو جام هڙتال ڪئي ويندي ۽ ڀرپور احتجاج رڪارڊ ڪرايو ويندو۔ بيرسٽر گوهر چيو ته باني ۽ جماعت جي سڀ کان وڏي طاقت ان جا ورڪر آهن، جن رياست جون سختيون برداشت ڪيون آهن۔
هن وڌيڪ چيو ته عمران خان سان سندس ڀينرن ۽ وڪيلن جي ملاقات ضروري آهي، جڏهن ته قومي اسيمبلي ۽ سينيٽ ۾ اپوزيشن ليڊرن جا نوٽيفڪيشن جاري ٿيڻ گهرجن۔ هن وضاحت ڪئي ته ڀيڪ واري ڳالهه کي غلط رنگ ڏنو ويو، مقصد اهو هو ته عدالتي حڪمن باوجود ملاقات جي اجازت نه ملڻ ڀيڪ برابر آهي۔
بيرسٽر گوهر چيو ته پي ٽي آءِ ڪڏهن به ڳالهه ٻولهه ختم نه ڪئي آهي، پر پنج وڏن جي ڳالهه ڪرڻ جو ڪو مطلب ناهي۔ هن ٻڌايو ته اسپيڪر صاحب نوٽيفڪيشن بابت ايندڙ اجلاس تائين فيصلو ڪرڻ جو چيو آهي، اسان چاهيون ٿا ته اجلاس کان اڳ اپوزيشن ليڊرن جو نوٽيفڪيشن جاري ٿئي۔
عليمه خان جي ڳالهه ٻولهه
ان دوران عمران خان جي ڀيڻ عليمه خان چيو ته قرآن خواني ۾ دير ان ڪري ٿي جو رستا بند ڪيا ويا۔ هن چيو ته باني کي قيد دوران اڪيلائي ۾ رکيو ويو آهي، جيڪو آئين جي خلاف آهي۔ هن حڪومت تي تنقيد ڪندي چيو ته ملڪ معاي طور تباهه ٿي چڪو آهي ۽ ماڻهو حڪومت کان تنگ اچي ويا آهن۔
ڌرڻو ۽ صورتحال
اڄ عمران خان ۽ بشريٰ بي بي سان ملاقات جو ڏينهن هو، پر اڊياله جيل جي رستن تي پنج هنڌن تي ناڪا لڳائي بند ڪيو ويو۔ پي ٽي آءِ ڪارڪنن فيڪٽري ناڪي تي قرآن خواني ڪئي، جتي پوليس پاڻي جو ٽينڪر آڻي ڇڏيو جنهن سان ڌرڻي جي هنڌ تي پاڻي پکڙجي ويو ۽ شرڪت ڪندڙن کي هنڌ تبديل ڪرڻو پيو۔
سلمان اڪرم راجا چيو ته قرآن خواني اسان جي دين جو حصو آهي، گندو پاڻي اڇلڻ شرم جي ڳالهه آهي، اسان حق جو آواز بلند ڪندا رهنداسين۔
بعد ۾ عمران خان سان ملاقات جو وقت ختم ٿي ويو ۽ باني جي ڀينرن سميت ڪنهن به اڳواڻ کي ملاقات جي اجازت نه ملي۔ باني جي ٽنهي ڀينرن ڪارڪنن سان گڏ فيڪٽري ناڪي تي ڌرڻو جاري رکيو، جنهن ۾ سلمان اڪرم راجا، عون عباس بپي، شاندانه گلزار، نعيم پنجوتها، مينا خان آفريدي ۽ شوڪت بسرا به موجود هئا۔
